ধ্যান

করতে করতে পাতালে থেঙযারগা জাঙ এহানি,
পাথরর মূর্তি আগর মুঙে মর যত ধ্যান!
মুরগ বাগের,রকতর ছড়াহান বাহের তবু
কানা নেই এরে ধ্যান,আপ্পানেহান ইসে।
মূর্তি অগর আহির পানি মি দেখলু,
আকমাউ নাগৈ কত্তমাউ!
কিয়া কাদর? কিয়া কাদর?
আংকরলু ,কোন জবাব নেই।দীঘল নিংসার মাহি
চারিবারাদে আধার করিয়া এরাদিল হিম্পিয়া!
মি চাউরিগ,কতযুগ আগেত্তই
উপনারেসু,আজিও উপনারুরি,
কালিও চেইতউ উপনুয়ারিয়াই!
কোরাং মাংকরেসে পরশপাথরগ কি জানে,
যদি হারপিতু,যদি আক্ষুরুম মাত্ত-
থতাহাং খুলিয়া,মরতা পাতাল পেয়া যানার কথা নেইসিল।
ডর জবর মূর্তিগ তর মুঙেই এরাদিলু
এমারিকার লাংকরা জনম এহান।
বারো পাতাল এরাদিয়া তর লগে মান্না ইতউ,
হয়তো তর ডর নেয়তই,নাইলে মি পাথরগ ইতউ।
১৮.০৩.২০১৯

মনে মাতের মরে

চিনির চাকা আগ অইং মি,
যেবাকা তি পেপুরা জনম পার!
মধুচাকর ঠুম্পা রস অইংগা
নিঝে নিঝে পড়িং মাটিৎ,
তি মুণি বেঙলগ অইয়া ফর্দিস
বেঙলর জমর খাটিৎ।
পারেঙ পারেঙ পেপুরার হাদিৎ-
কিসাদে চিনতউ তরে,তিই মাত?
নাইলে ফুলর ভিত্তরর মধুরস অইং
এরে জনমর নাঙ হাবি পাহুরলে-
আরাক জনমর নাঙ আহাল্ল ডাহিস,
গুন্ গুন্ এলাল,কাল্লা ভমরা আগ ইয়া।
মরে যদি আহির পানি করর কোনদিন্
অতা ইলে তি চিলা ইয়ার দুঃখ ইসগাক!
মি ডাঙর হাগ আহান যদি অউরি,
তি হাগর ফুর্দুরা পাহিয়াগ ইয়া থাইস হাগে।
অউরি যদি ঘাটর পানিসিটা-
তি ঢেউয়ে ঢেউয়ে গলিয়া থাইস,
তিঙে তিঙে মর পানিৎ !
রাস আহান এলা অইংগা তর সালে
লগে নাসলেও নাসকা গোপী পালে পালে
তবু তি যদি ভিষ্ম অরগা কোনদিন
মরে তর ইয়াসাকে জিংতা করিস।
মর শশ্মানর জ্বিগ নিভতই অদিন
তর ভিতরর মি অগল,তিও জিংতাগ মরিস!
২০.১২.২০১৮

পথগ ইমে আগর অগই

পথগ ইমে আগর অগই
কিত্তাউ তঙাল নাসে,
হাবি পাকথেকে, হাবি কাকেই
আগর অতায় আছে।
এমারি কাটা বিধিয়া রকত না পড়বো
কোনো জাঙর পাতাত্ত,
বিভুলা অয়া আধাপথে না খামুইব-
কাকেই,হাদি মেরাকেত্ত।
পথগ ইমে আগর অগই,হাই
জাঙর পাতাও আকতা-
মুখোশর তলে পনিয়া আছি
জাত জাতর সাকতা!

২৯.১১.২০১৮

হমাজি শুভাষিনী

হমাজি শুভাষিনী কতিদিন পিসে আজি বহেসু টেবিলহানাৎ
খালকরুরি, এবাকা হাকহানর মেঘর মিছিলহানাৎ
তেরার সাদে আহিথম, তোর নাংহানর সাদে নাংহান
বাহিয়া উঠের, ঔতাইলে আজি ছবিহানর হাবি সরঞ্জাম
বেলা দিয়া, পাহুরিয়া বিভুর মৌসুমীর
ৱাইসাং মনে ইম্পানি বয়া থাইক তি বার মি।
বেদনার বোধর কুরিগৎ ফুল শাতর, জঙের অবিরল
হপনর আহিথমে ঔ তিঙা খুৱার পানি!
বুকগর বেহালা আজি করুণ ইমনে মুরগ থয়া
আদারহানাৎ বয়া আসে জীবনর এলা, হাবি রঙ গুরিয়া!
হারনেই কিহানর আসুলহানে তি এ সেয়াগর চিপাগৎ
নিক্কাদিন ফুল কতগল দেহা দেউরি নিজর মনে ।
তোরে পাসু কাদাৎ পথর ছন্দর সুরগৎ এলাৎ;
এসাদে পানার মূল্য নেই , অমূল্যর য়ারি কুংগই হারপার।
জীবনর যৌবনর পথে পথে হারৌ হাব্বিতা
বুকগ বাদিয়া তি হজাক অ। তি থাক । মি জিংগা।
মোরে ডাহিয়া নিলেগা আদারে—- দূরেইৎত কতি দূরেই;
মাটির লপুকর আহিরপানি কাদন আজি রাতির বেলিটিকে।

কবি!
তোর নুঙেইর হপন মোরে দেসৎ । বার মি
উতার প্রতিদানে হুদ্দা তোরে মাতেসু: মুক্তিকামী।
তোরে মাতিং মি মোর শুভাষিনীর কাদাৎ
লিশিং সুরর ছন্দল এলা অরেয়া
প্রেরণাময়ীর প্রেম তি হারপাসৎ। ঔহানে আজি
মাম রাতির গরগৎ ইঙাল ঙালকরিয়া তি হজাক অ
তি থাক । মি জিংগা।

১৯৯০

ইমার ঠার

রাতি এহান তোর নাঙে কাৎকরলু
রাতি এহান মোর হিয়রগৎ বয়া থাক তি

মি য়াকরৌরি, মি লালসু
তোরে পাহুরিয়া বেলেয়া আহেসু ইমার লেইফামহান

রাতি এহান মোর লগে থাক
ইমাম রাতিহান টটরানির ঠারহান পেয়া নেই

মোর অকনেইহানে আজি দশা এহান
লেইপাক পুঙে কইল

ঔরে হিলর সরাহানর ঔপারে থায়া
মি হারপাওউরি, মোর দোষে , শিরাপ দিতারা তানু

আট্টিংগা হানাৎত পরের জ্বির মেইরিক
লেইপাকে মারা, এতা হাবি মোর অকনেইহানে অরতা

আজিকার রাতি এহান মোরে তি কালকর
আজি, রাতি এহান তোর নিঙে কাৎকরলু, তোর নাঙে

বিষুর দিনে

বিষুর দিনে
দসু খেলেই
আগদে মুনি
আগদে জেলেই

চিৎ চিৎ চিৎ
নিকুল তিরিশ
ছক্কা ‍! পচিশ ! ছক্কা !
গুট্টা !
হকে ডিফলা
বয়া থাইলা
নিঙল অইলা বক্কা
অগগা !

খমকরেকুরা: কাঞ্চনবরন সিংহ

মনীষার প্রিয় মেয়েক

50889760_2275761266028583_364373609369567232_n
শহর এগর যেগদে মিল্লেঙহান যারগা তোর প্রিয় মেয়েকউতা মনীষা
তোর প্রিয় মেয়েকউতাই হাজেয়া থসে আমার শহরগ
ঙাল শহরর গলিপথ
তোর প্রিয় মেয়েক উতা দামি ব্যানারে
দামি ব্যানারে হাজেসে জিটিভির উদীয়মান কন্ঠশিল্পীগর নাঙে বিলাসী খুৎতল
ঔবাকা এ শহর এগর রেল স্টেশনে অন্ধ ভিখারি ইসালপাগ অবহেলিত অর
লৌকিক এলাহান গেয়া
তোর শহর এগর রাজপথগৎ মা লেপসে পুরিজেলা মালকগ
ভক টাটিয়ে হুকেসি সৌ
খানারতা নেই সহায় সম্বল নেই কামনেই য়ামপারা মানু লাংলাল
দিন লিৎকরতারা
তানুর মুরর গজেই বিদেশি কোম্পানির বিরাট বিজ্ঞাপনহান
বিজ্ঞাপনে আঠারোর নিঙল আগ তেইর নাঙহান ফিজেৎহান
মনীষা তোর প্রিয় আইটেম সঙহান আসচুলে চিকারি দিতারা মুঙর কাফে উগৎ
কাদার ফুটপাথগৎ বিচলিত লেইরাহান যৌবনহান গুরে নারিয়া

মনীষা গরে গরে ইংরেজি-চৌহাৎ তেনুৱা তানু হার নাপেইতারা হারপাউ নারতারা নিক্কাদিন আকেইহান আকেইহান মাঙর ইমার ঠার
বিলুপ্ত প্রজাতির সাদে মাঙয়া যারগা আমার সংস্কৃতি
আমার পুনরুথ্থানর হপন আমার হারৌপার নাসা

মনীষা তিতে কুমবাকাউ দূরেই অয়া গেলেগা এতার পৌ নাথউরি

তোর দুঃখহান এবাকা টিভি চ্যানেলর ধারাবাহিকর নায়িকাগর দুঃখর অভিনয়হানাৎ
তোর হারৌহান এবাকা টিভি চ্যানেলর ধারাবাহিকর নায়িকাগর হারৌর অভিনয়হানাৎ

খাসিয়াগ

ফিচারড

খাসিয়াগ
পানা বেসাত আহেসে,
পানা মুঠাগ
মোর আতহানাত দিল ।

মুকেয়া চেইতে
বড়ি আঙুলির ডেকি পাতা শৌ আহান
উতাৎ হমাসে ।

আংকরলু ——–
এ পাতা শৌ এহান
লেহাৎ বড়াসৎগ ?
উত্তরে মাতল
হায়——-
বেলানি বানা পেয়া
লেহাৎ বড়াসু ।

বানানুংশি প্রেম নেয়ইলে
পৃথিবীহান নেই।

দেবব্রত

মাতিয়া যানা মোর য়ারিহান হুন-নাহুন তোরহান
ঠুনিংশায় তোরে বেরলে পাংকরানিয়ৌ মোরহান
কালর হুতে হাবি গিললেউ তোর পরাদে থাইতৌ
বিশ্ব সুরর রাগ-রাগিনীৎ তোর এলাহে গেইতৌ।

ঘুমহান বাগানির পিছেদেউ

brajen
ঘুমহান বাগানির পিছেদেউ
হপনহান যানা নাকরিয়া

ফামহানর কোন আগেদ পড়িয়া থাইল।

যাগা বুলতে মাতের

থাইংনে কাদা আগদে পড়িয়া।
নাইলে তোর ঘুমাহানাৎ লুকেয়া থাইংগা

ঘুমর হাদিতৌ আকখুলাগ নাইবেতা।

সনাতন মিশ্রর কবিতা কতহান

কোকিল বারো কওয়া
‘রসর পুজারী মিতে’ মাতের কোকিলে
রহুরিতা বসন্তৎ রসিকর সালে
কওয়াগই মাতের, মি কাদে কাদে লৌল
আহুরিতা যুগে যুগে মিঙালর পৌল।

আশা নিরাশা
জরমহানউ কালি বুললে ফিরালহানউ আধা-জট
চহাই মাতের কুপকো চেয়া খুলের উন্না ফটাফট
ড়ুফাই মাতের যেজাত জটগো আইব কালি মচাগো
মাত্তা কুঙ্গ অসে হতাশ আশার মিঙাল দের কুঙ্গ?

হেকঠেলা
কলংকতে কারতা নেইতা বেলিহান না জুলাক হান
গসে পারলে নিজর ভুল কারতা আরো নিজর মান
হুকানালো সাককা সাইরি জুনাকচিলাউ চেইতা চেই
জেঙা কলার লাফাং-হানে চাঙ-চিতর দামউ নেই।

তালে-তানজায়
মকা মাছর ইকা দেহিয়া পুঠি হাবিয়ৌ ছুটি লইলা
পরমৌ গরম অসি ফেটিয়া বারো লেটিয়া বইলা
বিলে বিলে বিলই অইলা চেকচিল যত চাকছিরা
জারমানিৎ গিয়া জিরেইলগা গর বাগুরা মাগুরা।

লৈলাট
নামই আগয় নাগই সায়া অরর য়ারি অরারতা
বুয়াল আগো কুয়াল ফুলিয়া ডাকতর মাহি দেহারতা
বালিগরা বাজুমারা পাবিয়ারতাউ রকত পানিয়া
বাও আগয় বুজন সারতা ওজনহানউ নেয়য়া।

গৌরব
চৌহাত হানে জিঙল বিশ্ব দেশ বিদেশৌ ঙাকইলা
বিজয়মাল্যউ পিদাদিয়া দেশর ঝান্ডিয়ৌ উড়েইলা
আংকরতারা বেরি দিয়া, মাতের ইমার পরিচয়
উগয় আমার জাতর গৌরব;  কাঠি নকুন নাগই।

শান্তি না অশান্তি

ধার করিয়া দারকিনা গিদেই কিনা-কাটাউ করিরি
বের-বেরসায়া বেরি চিলায় বেরা-বেরিয়ৌ বাড়েইরি
গঙ দরেসে গঙিয়া বিনি হিং তিনগিয়ৌ হিঙারার
বামী মামীয়ে আমিয়িরি চেঙ বুড়াবায় চাঙ চার।

বিদ্যার ভর

বিদ্যার ইমফাম হুতা দুনিয়া পিদলু মুরে চুড়াগি
হেইবি-নাইবি দেউরি লুহুপগো না চাই-চাঙৎগো
ইমাঠারউ খেতকরিয়া মাগধীমাউ নিকাললু
ফুলর মালা পেইতৌ বুলতে মুন্ডমালা পেইলু।

প্রেমর হিসাব

মজেসিলাং প্রেমে দ্বিয়গি মাতলে খাংদা আকদিন
দুই-নম্বরি তোর প্রেম পেইলু আইত্তে উতার চিন।
নুয়া প্রেমে তি মারাঙকাইলে মোরেউ দুরেই কইলে
খালকরিয়াউ তি মাৎতা নিজে কয়-নম্বরি অইলে!

চৌপদী তিনহান

ভাষা-জ্ঞান
অতগি আজি ‘অধর’ অইলা পাকথিয়ৌ ‘প্রজাপতি’
গোকুল্লেইয়ৌ’বকুল’ অইলি মাৎতু আরতা কতি
ভাষা-তত্ত্বর জ্ঞান নাপেয়া থাইলু মিতে হৌরে-হৌ
‘বিদগ্ধ-উ খুমিত কাসে ‘চিঠি’-য়ৌ মোরাং চের-পৌ।

নুয়ারা
আগই মাতের বালা ‘অসু’ আগই মাতের ‘নাছু’
নুয়া ‘নুৱা’ নুয়ারালো জবর মিতে হিনপাসু
চুয়া-রে কয়দিন ‘চুৱা’ লিখতু গুয়া-রে কয়দিন গুৱা
গানুয়া পুসিয়া দুয়ারহান খুল্লু ইমার মেইঠং চেয়া

বর্ণমালা
‘ঞ’ এগ কিয়া না পালরতা ‘বিসর্গ’-গউ য়াম দুঃখৎ
‘ব’ এতা কিয়া দুগো আসি মাতিসতা তি তোর মত
‘চন্দ্রবিন্দু’-য়ৌ মরারকা  ‘ হ্রস্ব লি’-গৌ সুল্লেদে
‘উয়-ৰ’ এগ নাইলেতে ‘রুৰা রুৰানি’তে কিসাদে!

মাগেসিলু সরা আহান

মাগেসিলু সরা আহান বারো
ঔহানর পানি
লক লকার কালোগর সাদে, বারো
আরাক জনম আহান-
কুমারী নিঙল আগোর সাদে
প্রবঞ্চনা-নেয়।
পস্তেয়া পস্তেয়া যারগা লাংলা-বুজা মিকুপ
সংখ্যালঘু মানুর সাদে গুজয়া গুজয়
বারো, কাদের মোর বিতরকার ঠইগোয়-
জিরন নেয়
আহির পানি
মৌজেলেইর মুতো যারগা হেদিগীর সাদে?
সাপুড়িয়ায় জারিয়া বেলার হু ঔতার সাদে?…

হেক এগরে চিনে নুয়ারলু

হেক এগরে চিনে নুয়ারলু আজিsamd-1
ঠইগরে আংকরতে তাউ মুছল আহির পিচুম, অন্থকপা বেদিশা এরে
পথে ধুলি খারি’ল বাসিয়া থাইলু
লেইরাপা গাঙর ঝোপে-ঝারে, নেন্নাম শপার কাচা-নুংশি
গতগ সকিয়া যারগা বৌহানরে মাতুরি, তুমি চিনোরাইতা”
উত্তরর আগে আগে আধারহানে গুরে দিল তাঙর মেইথঙ।
হাব্বি কথার মেয়েক, হাব্বি এলার সুর আকিদিন
চালহানাৎ ঝরং ঝরং, আকিদিন নিংশাগির ইত্তাউ মালয়া বারো
বিতরর গরে
হেক এগরেতে চিনে নুয়ারলু, কুরাংত আহিছে হারনেই
দেহগর সপ্তসুরে নিজরে বাদানি লেপুইল, মি খামকরে নুয়ারলু।

জিঞ্জিনির এলা

এতা হাবি জিঞ্জিনি থাইতে।
জোনাকহানৌ কিয়া গজে কাইতে।।
আমরে’ল নাইলেতে আধার অয়া থাক।
হাদিৎ তি গজে কায়া নাঙ পানা না’ক।।

গাটর পারে

গাটর পানি গায়ত্রীমন্ত্রর স্পর্শ সুখ পেইলে হারৌপালাজে নিক্করিরী
তেইর সাম্যবাদী মুকসিত দিশাহারা অইতারা কনাক শৌ
গাটর পারে কুশর হাদিত বহেসি লালফামী তাবু ঔতার বিতরে
দক্ষিনী নিঙল আগই ললকরেছে আচানক গুহাকল্পনা আগ অরিঙ বারো বনমানুর ছবিল
মন্ত্রমুগ্ধ পারাল তেইর কাদাত চেপইলেগা দেখলু সেলপুঙর রৌহানর সাদে বিষন্নতা আহান
তেইর আহিগীৎ

জীবন এহানরে আতেয়া চেইং বুলিয়া হাইফেন  দুরেইর তেইর অনুভূতির কাদাত
পৌঅইলেগা তেই বরণহান অলয়া মোরে তিঙা দিল
এ জনমকারকা হারৌ খমকরিয়া বিরামচিহ্নর ছেয়াগৎ বহিল বিষ্ময়চিহ্ন
কাদার ঘাসফুল ঔতাই মাতলা,
কুমবাকা গুমহানর গারিগৎ বরণ দিয়া হদাছে হানৌনাপেইলাং!

মালঠেপর এলা

আরতে কতি মালঠেপ আগৎ ‘চিপাচিপি’ বহানি
লেরিক হুনাৎ বয়া বয়া ‘আহির পানিয়ৌ পুছানি’;
‘মৃতা’ আগ ‘নাইলে নাইব’ আমার ‘মহৎ ফুরতি’
‘লন্ড ভন্ড’ করিয়াহে নায় ‘দক্ষযজ্ঞ’ পুরতি।