খয়াত ইমার

চরণ খয়াত তোর দিয়ৌরি মি হমা;
দোষ-ত্রুটি, অপরাধ করেদিস ক্ষমা।
করাক কবিয়ে আজি সেঙ-পুঙনিঙে
কাতকরৌরি কবিতা হাবি তোর নিঙে।
কাবিতারূপ খুত্তল লদে অয়া হারৌ
কিতা আর দিতু ইমা নাকরিস য়ারৌ
মাঠিয়াদে পুতকরে ‘পুনচি পালক’;
ইমার সেবালো মোর জীবন কাটক।
নাচাউরি কিত্তাউ মি মোর এ জীবনে;
জনম জনমে আনা ইমার চরণে।

ব্যর্থ লালফাম আহান

মি মানু আগো, মনুষ্যগো মি;
মানুরকাই খালকরানি
থকহে মোরতা খানি।

মানুরকাই অ’না মি মনাউরি আগো
কবি।

মানুরকাই কবিতা ইকরানি মনাউরি মিতেঃ
লাঞ্ছিত, বঞ্চিত, নিপীড়িত, শোষিত আত্মার
নিঃশব্দ কাদন – রহন, জুরন, বারো বেদনার।

কবিতারমা’ই মিতে নিকালানি মনাউরি
নিঙস্ব মানুর হিন লাংলা
কবিতারেলোই মিতে লাগা দেনা মনাউরি
রকত চুহুনির রাজা-জিনাৎ
বিপ্লবর দাবানল, হুকানা আত্মার-
রৌ।

দুনিয়ার মানুরে মি হুনা দেনা মানউরি
লিশিং আত্মার অব্যক্ত বিদেনার
বুকফাটা চিকারী।

কিন্তু হায়! নুয়ারলু আকতাও মি, মনাসু যেতা
নেয়সে মোরাং কুনো ঔসা ভরি শব্দ
শব্দর করুণতা, শব্দর বৈপ্লবিক ইরৌ
মোর লালাফামরে সার্থক করানির।

আজি পেয়াও মি ঔসা কবি আগো নুয়ারেসু অ’না-
মানুরকা।

নিঙহান থাইলে

নিংকরিয়া দিলে পিড়া এহান তি মোরে
রাজ-সিংহাসন আহানর সমান-
খুলা-অন্তরে দিলে এ ফিকা চা’র কাপ
মোরাংতে অমৃত ছিটার সমান;
সরল মনর তোর এরে যে মাতানি
লিশিং লিশিং কোটি সম্মান মোরাং।
বিপদ সময়ে পাচ টেকার পাংলাক
পাচলাখ পাংলাকর সমান মোরাং-

নিঙনেই মানুগো যেগো, অিএরউ বেয়ক, পরগো
সরল-নিঙে থাইলে ঔগো, মিয়াঙ অকনে, মোরগো।