গাটর পারে

গাটর পানি গায়ত্রীমন্ত্রর স্পর্শ সুখ পেইলে হারৌপালাজে নিক্করিরী
তেইর সাম্যবাদী মুকসিত দিশাহারা অইতারা কনাক শৌ
গাটর পারে কুশর হাদিত বহেসি লালফামী তাবু ঔতার বিতরে
দক্ষিনী নিঙল আগই ললকরেছে আচানক গুহাকল্পনা আগ অরিঙ বারো বনমানুর ছবিল
মন্ত্রমুগ্ধ পারাল তেইর কাদাত চেপইলেগা দেখলু সেলপুঙর রৌহানর সাদে বিষন্নতা আহান
তেইর আহিগীৎ

জীবন এহানরে আতেয়া চেইং বুলিয়া হাইফেন  দুরেইর তেইর অনুভূতির কাদাত
পৌঅইলেগা তেই বরণহান অলয়া মোরে তিঙা দিল
এ জনমকারকা হারৌ খমকরিয়া বিরামচিহ্নর ছেয়াগৎ বহিল বিষ্ময়চিহ্ন
কাদার ঘাসফুল ঔতাই মাতলা,
কুমবাকা গুমহানর গারিগৎ বরণ দিয়া হদাছে হানৌনাপেইলাং!

ফিলগুড

“…my father, let my country awake”
.                                                       -Rabindranath Tagore

হিঙর আলির দৌর লগে লাকাটি আর কইদিন?
জনম এহান সিসিফাসর লালফাম।
.                        হুদা খের বারো হিলর লুমপাক।
গোধরা বিহারি নিধনযজ্ঞর জ্বি ফুরেয়া গুমজিতেগা
শাড়িকান্ডর নাগই-হপন – নিরীহ মুরর ঘিলু ফাটের পুড়া আলুর সাদে।
ক্ষীর-মাখনর গিল্লা খেলাৎ সুনুসাতু অর জিনার হপন
দুঃখর গতে খইতু লাঙর ইসাং ধার আত্মাগ।
মৌলবাদী শিরাপে বেলিহান গং ধরেসে
জোনাকর মিঙালেউ বিদেশিনী গঃ।
ইনচিকচিক সমেইর গারিগ খতকরিয়া পিত্তিরির লৌ
ফি-ল-গু-ড-ফি-ল-গু-ড-

আহির পানির পথেদে গড়াগড়ি দিতারা
কঙ্কাল শৌ
রম নেই কুকুর
বারো
ভিক্ষারী সম্রাট।
ফিলগুড।

অলাঙর পদ্য

নিখিল বৌয়ে আজি কার অলাংকরা য়ারি
আয়ুরেখাহান লমসে পেয়া আটে গেলেগা
পৃথিবীর জরায়ুগ
জনম আকেইহান মিথ অনার আগে
চুরাশি লাখ স্মৃতির খুয়া-খুয়া মেইথম
মিহুলেদে দাপদের যেপেই।
মাতিল য়ারি য়ামপারা আসিল- বরণ, হপন,
বার ফৌদকর
এলা দিক বুলতে বরণর পানিয়ে, মরণর
রাগগই ধয়া নিলগা পদরেখা
বিয়ানকার আজানর মাঙ্গলিক ধ্বনিয়ে
পাহুরানি নাদব পাহিয়ার বাগা গরগর কথা
লালফামী মুদ্রা ঔতা
নীরবতার হাজেস মিকুপ এতা রাঙাগ
করতাঙাই
মুক্তিযুদ্ধর গরিমাল

কর্কটরেখার কাদার কবিতা আহান

ধ্যানমগ্ন শলাকাগর নারগৎ বিধেসে প্রশ্নচিহ্নহান উহুলে দিতেই অর অর
করিয়া অর-পেক নিজানি অকরল। বরন ডাহানির এলাহান দেনা নাই
এবাকাতে অর-পেক হাবি ধয়া নিবগাতা। নবিৎ আহান, ফলাল, মানু
পুলইলে ঔতারমা বিষন্ন চতুর্ভুজর লগে মাঙসিগা তেনার দাবান কইনা
জোড়া আহানউ। শৌর আতে আতুর বন্দুক। পোস্টারে পোস্টারে নিঙলর
মাংস। তানুর চিকারীগ পেয়া নগ্ন। মালেমহান হাপদেসে মুনির গতে। ঔ
গতে অরং অরং জর্ম লাগের হপনর, চেতনার। তেবউ গায়ত্রী,
নাসরিনগাসিয়ে আন্দুকা পথ হংকরিয়া সালসি প্রথিবীর ঘাসর গজেদে, এ
ঘাসর গজে গুমজিয়া থার তেনুয়ালাং মাচুর খৌরাং। খৌরাঙর বাথটাবে
জাবুরিয়া থার আমার কৃষ্টি, আমার কবিতা। কবিতা বুললেই ইরেলগ অয়া
আইতরা সাহেব বিবি গোলাম, কবিগান, চৌপদী, স্মার্ট চিয়ার্স।

লেংটাসাধু আগ ফুঠপাতগদে গৈগ অয়া সালসে আগদে
কমন্ডলুগ আগদে সেলহান ধরিয়া।

শোলকর বিতরর রইদটুমা

গারিগই গারিগর ফারহান উপইলেহে চন্দ্রাবলী
গা
রি

জোনাক পালইতনাই
রাসমন্ডলীৎ ফুলর



দিতনাই

মনে মনে লেহাজুহা নেই পাপ করিয়ার
ঔতা
ধয়া সেংকরতে রাম কৃষ্ণ কথামৃত ফুটা আগ
পিতৃপক্ষর সিদ্ধাহান আটিয়া আহের
কৌগর প্রাগৈতিহাসিক পাপ পূণ্যর বেদে