হে সপাহান

হে বৃক্ষ, তিতে প্রাণহীনগো নাবে, তোরতা প্রাণ আছে। তোর প্রাণ এহান আছে উনিয়া তি খানিপারা উবাইয়া, খানিপারা ঘুমিয়া আসত। তোর প্রাণ এহান নুয়ারের কথা অতারানি। তোরাংতো আমি কিহান আশা কররাং আমার কল্যান, আমার উপকার। হাবিত্ত প্রাপ্তির বিষয়হান ইলতা অক্সিজেনর পালাবদল। তোর অবহেলার জন্য তি দুঃখ নাপেইস। মি হারপাওরী বরনের দিনে পবনর লগে তোর মনমালিন্য। তোর জগৎ এহাত আমার জগৎ এহান কতিহান ভিন্ন। আমি দাবদরাং হুদ্দা স্বার্থর পিছে। তোরে যত্ন কররাং নিজর স্বার্থ এহার কাজে। তি দারুন নিঃস্বার্থপর, হুদ্দা মানুর উপকার করিয়া গেলেগা। নিঃস্বার্থে আসবাপত্র ইয়া ঘড়গোর চুনাপাহান বাড়ার। ছায়াগো দিয়া চৈত্রর বেনিদিকগোত পথিকরে বিশ্রাম নিতেগা সাহায্যকরর। যদি কোন দিন প্রয়োজন অর মরে ডাকিস, মি আহিতউ । তি যতদিন ধরিয়া জিংতা ইয়া থানার ইচ্ছা নিয়া আসত এ পৃথিবী এহাত ঠিক ততদিন তোরে বাঁচিয়া থনার চেষ্টা করতউ। নিংসিং ইলে ডাখিস, মি আহিতউ। মোর আতহার আমুনিগো কাপিয়া রকতনো তোরে আলতা গনেইতও। তোর ডেংগোত কাহিয়া নিঃশব্দে গুনগুন করিয়া এলা হুনুইতও। পিসে বিদায় নেনা লাগতই বিয়ানে পাখিয়া রোহানির আগে। তোর কাজে বিদায় বেলায় মি কাদতউ, হুত্তুমেউ কাদতৌ। যানার সমেইত মোর আখির পানিনো তোর হৃদিৎ লেখিয়া যিতৌগা তোর মহত্বের কথা, তোর উদারতার কথা। এহানই তোর জিনার সার্থকতাহান।