খাসিয়াগ

ফিচারড

খাসিয়াগ
পানা বেসাত আহেসে,
পানা মুঠাগ
মোর আতহানাত দিল ।

মুকেয়া চেইতে
বড়ি আঙুলির ডেকি পাতা শৌ আহান
উতাৎ হমাসে ।

আংকরলু ——–
এ পাতা শৌ এহান
লেহাৎ বড়াসৎগ ?
উত্তরে মাতল
হায়——-
বেলানি বানা পেয়া
লেহাৎ বড়াসু ।

বানানুংশি প্রেম নেয়ইলে
পৃথিবীহান নেই।

খালপারর কাঙ

খালপারর কাঙ –
যিতেগাতে আকতা অয়া
আলইতে ঠাং ঠাং।

কাঙর দিনে হারৌ অয়া
লেংকা মারূপ খমকরিয়া
আকতা অয়া সাজেল করিয়া
খালপারর কাঙ-
তিলইলাহা তিলইলাহা
হাব্বি হাতো গাঙ।

মৌনাহা পুরিজেলেই
সৌ খকে বহকলকেই
সৌ সুমারা গাওরাপুয়েই
ঘর ফুকয়া গাঙ-
মন আসুলের আসুলেসে
খালপারর কাঙ।

বরণ আহিল ঝম ঝমেয়া
সৌ-সুমারা কৌজিয়া অয়া
তিঙিয়া তুঙিয়া খিটখিটেয়া
থুর থুরারর আত জাঙ-
অরেনারে বিভূত অয়া
খালপারর কাঙ।

বেলি হমেইল আধার অয়া
বরণ হানো না এরিয়া
খংকুল খোজা কিত্তাউ নায়া
খালপারর কাঙ
যিতেগাতে আকতা অয়া
আলইতে ঠাং ঠাং।

কবিতা আহান

নিঙলশৌ আগ
আকখুলিগ
নিক্কা নিক্কা
ছবি আকিরি।

পলেয়া পলেয়া
মুনিসৌ আগ
ছবি আকের তেইর।

ছবি দ্বিয়হানর
হাদির যে ছবিহান
ঔ ছবিহান
বানাপানার।