কবিতা ঠইগ’

indexকবিতা তি মোর ঠইগ’
যুগ যুগ লেহে কতি নিঙে
ডাহেসিলু তোরে হোপন-টেইপাঙে
হাবিরাংত তোর সাদ হোভা,
মওং মাজা থমক কাকেই
নারগও কঙালা কতি
হে সখি! উপমা দিন ফাম নেই।

মনহাকহানাত বরোণর চাকা
বেলির মিঙালে ধরের রাঙিয়া
বলগায়া হাদিত, হাদিরমা আন্দুকা
যারগা তাহে তাহে এপারেত্ত
হৌপারে অসীমে কিহান না জানু
হৌমা যারগা পহর না আধারে।

তিতে কিন্তুমান ঠইগ’। জুরাগ’ মুকেয়া
এরেদিয়া দীঘল চুলসপা
বরোণর হাদিরমা কেথক খেলাউরী
মোর তুল’ ক্ষনে মুক্সি, ক্ষনে ক্ষনে
কাদিয়া রহিয়া কিহাস মাতউরী
মি আপাঙে হারপা’ নারুরি।

সুপ না টটরেয়া আসে তোর জয়
তোরাং মি টটরেয়া করলু পরাজয়
আজিপেয়া; বানানুংশির এহান রীতি?
তোরকা হৃদিগৎ পাতেসু আসন,
ডাহুরি হামজি বহেদিয়া আয়-
বুলতে কাদাত থায়ও দুরেই অউরি তি
চেনে নারলু হুত্তমেউ বিদ্যাধরী তোরে।

তোরকা করলু হন্না পালি মাহি
কিন্থুমান নাহিলে মোরগো অয়া
আজি পেয়া ; লিরি লিরি দিয়া
হৃদির পিঞ্জরাগত্ত নিকুলিল কতি
মাতিল কথাগো মাহি, এলাদিল এলা।
কিন্তুমানে পাজালেয়া ইমার ঠারে
নারলু মাতানি তোরে’ দুঃখ এহান।
মুকাদিয়া আয় মোর গাঠি হাবি
নিকুলিঙ তেজ বীর্য বৈভব হাবিল’
ইমার সেবাত থাক তি মোরতুল’
মাতিং লৌদে তি মোর কবিতা ঠইগ’।

কিহান কানায়’ (এলা)

কিহান কানায়’ জরম অইলু
মানুগো অয়া হুনার জাতে
মানুর হাদিত দুনিয়াতে
আজি পেয়াউ থানা নুয়ারলু।

পানির আইতে সরার বুকে পাতিয়া সরালু
মনাসিলু বুজতই মাছে
বেইরী সানাম্পায় বাগিয়া খাসে
পিসে মাগানির চামফুৎ খেইলু।

আড়গো বাগিয়া ক্ষেতিহান করলু
বেইবুনির কৌলিত লঙ্কা-পুরালো
মাংকরে দিল মাড়ায় মুড়ায়
উঠিয়া ধানর ভাতগো নাহেইলু।

জোনাক হানে ঝিক খিকেইতে
পাথগো আধার দেখুল
পিত্রি সাদহান হোভা পেয়া
হোভা পথগোরে আলিপেয়া
থল মনেয়া খঙে পড়লু।