তোরে

অহার পিছে তিক সৌয়িয়া তি আকদিন
দিয়াছিলে খানি উপদেশ,
মোরে নুঙৈ না লাগেছিল।
অহান্ন খাঙদা চুপ ইয়া গেছিলুগা।
(হারপুরিনায় উপদেশতে কারো না সহের)
মোর চুপ অহান দেহিয়া
তি মাতলে – তিক সৌয়িলেথাং?
না, তিক মি না সৌয়িম, কিদিয়া সৌয়িতৌতা?
(তাছাড়া তিক সৌয়ানিরৌ অহান থানা থকর)
হায়হান করে মাতুরি, ওদিন মি খানিচুয়াও তিক না সৌয়িছু।

অহাত্ত আরাক দিন আহান
দি খানি কড় কথা মোরে হুনুইলে
(অবশ্য অহান আপ্পানে নাবে,
মোর অপরাধ খানিঔ ইছিল সাত)
কতি নির্মম কথাহান
তেন্নম পয়লাকার দিনর অসারে
অর্থাৎ মোর মৌনতা।
খানিপরে কালকরিয়া বারে
(মোর ভেঙচা অঙতাহান দেহিয়া সাত)
মাতলে- দুঃখ পেইরেথাং?
দুঃখ?  মোর কাদিয়া প্রশ্নহান।
ঔদিন ঔ প্রশ্ন উত্তর মি হারনাপাসিলু।
আজি নিঙকরৌরি, যদি দুঃখ পাউরি
ধন্য ইতয় মোর জনম এহান।
কিদিয়া বুল্লে অহানৌ প্রাপ্তি আহান
জবিনে নাপেইন পানা।

অথচ মোর জীবনে ধন কিত্তাউ নেই
হাব্বি অপচয়।
অহান্ন তোরাঙ মোর অনুরোধ
মাতে পারুরি পাত্র শেষ মিনতি
মোর হুদালা পাত্রগত খানি দে।
না- না- না- ধন নাবে, মান নাবে, নাবে আঠুমপা মিস্টি
দেম হুদ্দা দুঃখ, ব্যথা বারো যন্ত্রনা।
আনন্দৎ মোর লোভ নেই-
অজান মিকুপর পানা- মিকুপআহার শান্তি-
মোরে হুদ্দা ব্যাথা দে
অহানই জীবনে অক্ষয় স্মৃতি
মোর চিরন্তন সান্তনা।