দিন আহান, রাতি আহান
বারো আরাক দিনআহান।
মোমগর সাদে কেলো কোলো যারগা
জিনার আঠুম্পা খৌরাঙ অহানলো
আমি হাব্বি নংপাঙ।
রাতি নঙেয়-নঙতলে বারো
টিকটিক বেলিটিকে
ঠুনিংশার হাদিয়েদে জরম অর
কুত্তিরাং আশা
জনমকার হপন আহানলো সালসি
নিজরাং নিজে পলা পলা
নাপ্পাল করিয়া
আকাম্পা মুক্সিলো
জিনার এলা দিয়া।
বারো
বিধবা অসে সরাউহান আহেসিলি
আমার চুরিতলগো পেয়া ।
ডিমালাদেসে বেলিহানর সাদে
কিরৌ নুঙেয়; হপন দেহেসিরি তেই।
সাংনাপেয়া তিনমুখিয়ার পুলিশ পইন্ট আগর সাদে
ওয়ান্থা অসে এবাকা তেই।
কাকারাহিল বারো লেঙউর থি লিচেতে
টিকজানার নাপ্লাল করিয়া।
রৌমেলিয়া, বুকথাপারেয়া কাদে কাদে
মাগেসিলি মোরাং –পানিফুটি। মি নিরুপায়
ডরে, লাজে গরগর বিতরে ইংগ অয়া
আসিলু। কিরৌ লেইরাহান!
এবাকাউ মি হুপে হুপে কাদুরি;
এমাটিক সলয়লতা মোর মাশিংকাগ
এমাটিক মি তলসুত!
বারো
বিধবা অসে সরাউহান আহেসিলি
আমার চুরিতলগো পেয়া ।
১.
এপেই সরা আহান আসিল।
সরার পটে পটে লামপাতেসিলা
লিশিং লিশিং মানুয়ে।
এবাকা কিত্তাউ নেই।
লেঙউর সটা, রিপুজির লত
বারো বন সাংকুরিয়া।
সরায় ইথেয় পটেয়া কতহান গাঙ নিলগা।
থাইলা যেতা সন্ত্রাসর সাক্ষী অলয়া মিমুত অয়লা।
২.
বাবায় দিয়া পেঠাসিল চিঠিউহান পাকরিয়া আসিলু
কাদাত আসিল কবিতার লেরিক উহান ওয়ান্থা অসিল
মেকুরি আগো ঘরগর কোনগৎ ফেঙারাদে আসিলি চেয়া
খাংতা ভিখারি আগর নারে
মোর চিঠি পাকরানি থেপয়ল।
ঙাহাক পিসেদে মাংকলে মিল্লেঙ করলু।
নেই! ভিখারিগ গেসেগা।
৩.
চা রে-
তোর লগে লহঙ অয়তয় বুলিয়া রূপাএতা
আহানরে দুহান হংকরিয়া থসুতা।
তোর খুচাপির ফিজেৎ বারো
সাজেলর মেঠেল কোনতাউ বাদ নাদেসু।
হুনলুতা, তি লাখপতি আগরে লহঙ
করলে উনি। হবা অসে, নিয়াম হবা অসে।
তোর নাঙে পুলকরা ধনলো চাকচা বিসারতৌ
এবাকা মি।
[সূত্র: মোর ইমারঠার মোর প্রেমর কবিতা, গৌহাটি, ১৯৯৪]
