মাগেসিলু সরা আহান

মাগেসিলু সরা আহান বারো
ঔহানর পানি
লক লকার কালোগর সাদে, বারো
আরাক জনম আহান-
কুমারী নিঙল আগোর সাদে
প্রবঞ্চনা-নেয়।
পস্তেয়া পস্তেয়া যারগা লাংলা-বুজা মিকুপ
সংখ্যালঘু মানুর সাদে গুজয়া গুজয়
বারো, কাদের মোর বিতরকার ঠইগোয়-
জিরন নেয়
আহির পানি
মৌজেলেইর মুতো যারগা হেদিগীর সাদে?
সাপুড়িয়ায় জারিয়া বেলার হু ঔতার সাদে?…

Advertisements

কান পাতিয়া হুনুরি

Dils Lakshimindra Sinhaকান পাতিয়া হুনুরি অন্তরর কথা
‘বল্মীক’র ভিতরেত্ত ‘রাম রাম’ নাং
অঙ্কুরিত বীজর খৌরাঙে
হৃদির বানা প্রেম প্রীতি
মহামহীরূহ অনার হপন দেহিয়া আসি।

হারৌপা থাম্পালর পুংনিঙে
বিলাদেনা চাউরি
বুকর উম জীবনর পৌ…

মি মলয়ার তুল’ তিলয়া গেলুগা
মানুরাংত অন্য মানুরাং
দেশ আহানাত্ত আর দেশ আহানত
আরাক মহাদেশ আহানাত
সাগর আগত্ত আরাক সাগর আগত
আরাক মহাসাগর আগত
গ্রহ আগত্ত আরাক গ্রহ আগত
অন্য নক্ষত্রর বেদে।

কিন্তু হায়!
মি চেপউলে মানুও হিল
হৃদিও পাষাণ,
পানি হুকের, জ্বি নিভের
মি কাইলে
হিমালয়গ গাতর
.             সাগর হঙর
কি লাংলাহান!

আহ্ সোমালিয়া

আহ্ সোমালিয়া
তোর পেটগৎ জ্বিগ
পুড়ের তোরে
তোর জিপুতরে

এপেইৎ পুড়ের মোর গারিগ
ভস্মসাঙারা মনহান
এপেই বিয়ানহানাৎ জ্বি
বেলুকাৎ জ্বি
রাতি হাবি জ্বি

পুড়ের মোর ইতিহাস
পুড়ের ইমার ঠার।

দুৱাদে জিরণ নেই বরন আকজুরি পরলে

দুৱাদে জিরণ নেই বরন আকজুরি পরলে মি করুরিতা
কুচয়া সুপ হুরকাং অনা
ঠিক গঙ্গারার সাদে নাগৈ
মোর মেইথংহান হজাগ অয়া থার।
মি দুৱাদে নিকুলুরি, ঘোর বরণজুরির পানির হুৎগ
মোর কপালহান বেয়া আহিগি আহরার
চুয়েয়া পড়ের তলেদে
মোর জাঙহানি ঠিক বুরের উহান নাগৈ, বাহিয়া থার
পাহিয়ার পাতল ফড়ির সাদে,
জঙা পাতার সাদে
পানির গজহনাত পরের বরণ ফুটার আঘাতে নিক্করতে নিক্করতে
হুত আগ পেইলেই যিতেগা যার গড়াগড়ি দিয়া
দুৱাদে বরণজুরি আহান পরলেই মি করুরিতা
দুয়ারহানি সুপ গাটিয়া নিকুলিয়া যানা
না ঠিক কুনবেদে লেপয়া নাগৈ
মোর আহিগি যারগা যেবেদে
হুতুমে মাত্তে গেলেগা হুৎগ যেবেদে বুলের
বাহিতে বাহিতে গড়াগড়ি খেইতে খেইতে ।
ঔতা কতিদিন

হয়তো য়াংখেই বসরর চুয়া
মোরে জরম দেসে মালকগয়ৌ হারনাপাসে সাদ।

ওয়র্ডসওয়র্থ

ফুলর বসন্তকালে ডাহের কোকিল
লতা-কুঞ্জর হাদিত মলয়ার বৌএ
উলঙ্গ প্রকৃতি চেই নায়া সুপ ঠিল,
বুনি দিরী। মাতিরীতা, -‘হিন না’কা শৌএ’।

কবি দেহের তেইর ডিল ডিলা স্তন
নিজর কাব্যর সুধা জিরনউ নেয়া
রমকাটা বারি দের ঔ কবির মন
গোপন সঙ্গীতে তার হারৌ-এ খেলেয়া।

জনমর এলা কবি ইংচিকে দের
পাহি’র, ফুলর সাদে নিজরার তানে
স্বার্থই ডিফেসি মানু। কবিও মাতের,-
“মানুয়ে মানুর সালে করলা কিহানে?”
“না কাদি তি কবি, তোর ফুলর এলায়
মৌকরের মানুর ঠৈ গোপন মায়ায়।

ছন্দ

ছন্দর গারিত দিং সেপ আকচারি
লমক য়ারউ হাবি কাড়ি-য়ারি
বাগে দিং তার যেতা মিছা অভিমান
কতিল সাহস! তা যে কবিতার কান
থ’সে দরে : নিজে নিজে রাহলিগ অয়া!
দিতুনি সিকহান? তা পাক কৃষ্ণ-খয়া?

চাউরি মি কবিতাই মানবত্ব পাক
মানু হৃদিত তেই বুলে বুলে থাক
যাকগা লেইকি গাঙে শহরে সাগরে
কারখানা’ ট্রেজারিত, ভোটর বাজারে

যতদিন আনুরিগা কবিতারে গরে
পিঠিত আহের তাতে চেয়া জিং দরে
না হমার গরে মোর বহের দারিত
বেরচেরা করেরতা কবিতা-য়ারিত
দলর মাপুগ অয়া শাসারতা মোরে
-‘নাথৈ আর কবিতারে নিয়া তোর গরে’
অনা তি গিরিগ তেইর মাটিকতে নেই
বেলেয়া থ দিতেই চেইস যেপেই হেপেই
কতিল ল্বুকরে থসু মিয়ে কবিতারে
থ’ নারতেই মান তেইর মাতুরি মি চারে
হবায় হবায় আজি আলথক কর
ইকর কতর গদ্য তোর পথ দর।

বাগরর রাহালিগ ছন্দ তি অসত
ধন্দ-বন্ধ লাগানির কন্টেক লসত?
কার সালে? কবিতার? কার অনাচার?
কিতাল জারউ নিজে এতাল তি পার?
টিটকারি, ঠিসলআ এতাহে জানস?
কবিতা মনার থনা নেয়া রস-কস?

এফির বাগুরি মিয়ৌ তোর অহঙ্কার
আনিকাল বুজাদিয়া তোরে গার গার
এমনো মিহান তোরে করে দিং আজি
কানাতে নাইব আর চেয়া কোন পাঁজি
আলি-তিকে, সেপ কাছ দিতাই জগতে
কতি দিন তি থাইতে আর মিছালতে?

টেইপাঙ মানু

গুরু আগয় ঘাস খার
মি খিলকিহান আংকরিয়াঔ দেহুরি
গুরু ঔগো রসিকগ
মানু এতাউ রসিক

পাগল লাবাকুকুর আগর সাদে চিকারী দের
পন্ডিত আগ-
নেতা আগ
মি মুক্সি দিউরি
কিসাদে পাঞ্জাল আগত তানু অসহায়।

মি পিঠার টুমা আকেইহান
থাংজাং আকেইহান
তানুর উবেদে উরা দিউরি

সাদ হবা বুল্লে কালির টুপিঔ অক
তাজমহলৌ অক
আকহান

তেবউ, আমি নিজর কান্থি বারো
স্বার্থরে দরিয়া থনারকা
অনাচার করিয়া এমালেমর বৌ বারো পানি

ঔহানে সাৎ
আমার দেহাগিও নিকুলে আহের লেজ
ডিগল অয়া

আচানক লালফাম আহানর পিসেদে
হমেইতাঙাই সেংক জংগলেদে

টেঙারা এতাই ঘর অলৈতৈ
গাছ এতায় হেজি
আসাংপা পৃথিবীৎ হুদ্দা
থাইতাই গাছ

জন্তু আরতা বারো মানু
লুকেয়া
টেইপাঙ মানু অনার সালেদে।