এবাকা আর আমারতা চিন্তা নেই

‘হিজ হাইনেস’ গাছির সম্মানতে
দেনা লাগরনাইঃ
সমাজ, সংস্থা, সংগঠন সম্বন্ধে অজ্ঞউ অকা
বা বিজ্ঞউ অকা
সভাসমিতিৎ তানুর উপস্থিৎ বৈভব আহানতে
থার নাই
কামর কাম অন বা নাক

অন্তত ‘লেসকার-সংস্কৃতি’র যুগে লেসকার ঔতাই
আমারকা কম প্রাপ্য নাগই।
ডাঙর ডাঙর সরকারী পদবীৎ আছি
বা আছিলা
ঐহানেই নিজরে জাহির করানির যুযোগ খানিউ
দেনা থক তানুরে-
আমি কিতা অমাটিক
অকৃতজ্ঞ অইলাঙ থাং?

এবাকা ভি-আই-পি-এ  সমাজর কর্ণধার
অইলারে মাহিতে, আর চিন্তা নেই
এবাকাতে শ্বৈনেই সমাজহান কিরকিরেই গজেদে
কাইতাঙাই!

অকরলো খেলানি বাছুরগীর লগে

ফিচারড

জারহানে খিট খিট নিককরের মৌ আগো
গারিগৎ ইমৎমৎ আঙেইশৌ আহান-
মাপহানাৎতো ইল হুরকাঙ;
পথগৎ বয়া আছে
রইদহান হবেহে পড়ে আহের।

বুজন আগই
গুরু কতগো ডিগারা দেনাৎ নেরগা
গুরুগীর লগে বাছুরশৌ দুগো
সারাৎ খেলতারা তিরিং তিরিং
শৌ উগই বাছুরগী দেহিয়া
লগ দরলো- ধাবদের, অকরলো সারাৎ খেলানি
তাঔ
বাছুরগীর লগে।

ভাবান্তর

তমসাহানর পানিয়ে মাতর তি
গঙ্গোদকম্ ?
তত্ত্বজ্ঞ-পুরষ হে গিরক
ইথলহানতে কিসাদে স্বর্গহান
অইলতা?

আদিত্যবর্ণ
তমসাহানাৎ হিনেয়া
উদাসীগো অয়া আটর কিয়া,
কুন ভাবে?
এরে হিরণ্য মাদান এহানে মাতের
অন্য কথা!

পাহিয়াগরে

পাহিয়াগো!
তি মোর লুহঙর দিনে
পল্লেঙে না-হমাছিলে উহান
পাহুরে নুয়ারৌরি আজি পেয়াঔ।

আসাংপা দিনহান, নাপু-রঙর হারৌ-পিয়াম
লেংকা-মারূপর ফাগি-রুহা ঔতা
তোরকা ডাকে দিয়াপেঠা নুয়ারেছু
এবাকা ঔতা সেটেলাইটে দিয়াপেঠানি মনাছুতা,
চেইং কিহান অর।

তি উনি সমাজর কামে দল-হঙকরিয়া আটৌরী?
হবাহান! মিঔ জনমএহান
সমাজর কামে আটলুগো।
কানানেই। বাদ দিলু। পকেট না বুজের।
তবেম পথগো মাহি আছে উনি-
সমাজর কাম করে করে খেউ তুলানির।
দইরাপহান- তিঔ লিম পাছৎ
ঔ পথ-ঘাটর।