উহানল’ মি যাউরিগা

চেকর বেরর ভিতরে থায়া থায়া
মি মাটিহান, মাটিহানর রঙ
হাবি পাহুরেছু্ চারিয়বেদে লোয়ার
হিনচাপার বিকট আর্তনাদ মানুর
আতে পড়িয়া। তানুর কালা
ঠুনিংশ্বায় হাকহান বুজের, হাকহানর
নীলিমা গুরেদের। এপেই বরন বারো
জারর পর ছাড়া অন্য পরর
আনাগোনা নেই। হাবিতে ডরেয়া হুদ্দা
মেইথং দেহেয়া যিতারাগা। পাহিয়া পলির
রৌ নেই। চারিয়বেদে হুদ্দা
মানুর ঢৌ। মি নিংশ্বা মাঙৌরি।

উহানল’ মি যাউরিগা মেরাক
মেরাকে উপেই, যেপেই হুরকাং
ছড়াহানর হুরকাং ছণর ঘরশৌ
আগর কাচা মাটিত মি দুনিয়া
এহান দেহেছিলু পয়লা। যেপেইর
লেংটা সারল্যর মুকসিত ভাহিয়া
যাউরিগা মোর জীবনর হুনার যুগ আহানাত।
মহা, মাছি, ধুলি, বালি, অরে বারো
গাছর ছেয়ায়, সাঙ লপুকে, পাহিয়া
পলির রৌয়ে মি নিংশ্ব বেলেইল
ফাম পাউরি। উহানল’ মি যাউরিগা।