অর্চনা সিংহর কবিতা কতহান

82627184_626343431460099_7764843070603919360_o
নূয়াপুরানা

হারপাসু এদিন
সেন্ধা অইতই।
এ মিঙাল বেলিয়ে বিদায় মাকতই।

পথেদে শৌর খেল পাহিয়া পলি মেল,
এতাহাবি বেলেয়া আকদিন চিকয়া,
ঠয় পাহিয়া এগো দেহা-পিনজুরগো
চরেদে এরাদিয়া যিতইগা ঠকেয়া,
এরে দিন-এহান আদারে জাপতই।

মর জরম-মাটি বাসেয়া আসে মরে,
সেঙ-করতো- করে,
অনাচার দেহাগো যজ্ঞর জ্বিগৎ
সেঙ-করিয়া তর লাইক করতই।

বারো আইতউ মি
তর এ নূয়া মেলে,
নূয়া তালে মিঙালে,
নূয়া-ক দেকতউ নূয়াতা চেইতউ
নূয়া হেকে বেণাগো নূয়া-ক বাতউ,
সেঙ-ক নূয়া এতা পুরানা অয়তই।

ডিসেম্বর ২৪, ২০১৯

 

ঠাচা

ঙাহাকর দেহা তর কেথকপা আহি-মিত্তা
হৃদিগো য়ৌচা অইলু মি ঠাচা।
ঔ দিনেত্ত বাদের হৃদিয়ে য়ারি মচামচা।
সেন্ধা হাগর পূর্নিমা-রাতি
য়ারি রস ফুটি তেরা কুটিকুটি,
হুনাদিল মরে তর য়ারিচুটি।
হৃদিগো য়ৌচা অইলু মি ঠাচা।

ফাল্গুন বৌ কুকিলর রৌ
চিকপা রাতিয়ে দের মরে তর
নাপাজালা কালি করপেক পৌ।
হৃদিগো য়ৌচা অইলু মি ঠাচা।

হৃদি থসে মনে লেহাউর বনে
নাপাজালা য়ারি জট বৌসুরি,
চিনাফুতি হালে খেতকরা তালে
নারচাসি সুর সিতারাসে মনে।
মুলুক জাপেসে য়ৌচা বৌয়ে
হৃদিগো সকর কুকিল রৌয়ে,
ঙাহাকর দেহা হুতে হৃদি পাহা
হৃদিগো য়ৌচা অইলু মি ঠাচা।

ডিসেম্বর ১৭, ২০১৯

 

পিঞ্জুরারমন (মিশ্র কলাবৃত্ত ছন্দ)

কুরাঙ বিসারতু তরে।
মন্দির মসজিত গীর্জা গুরুদুয়ারা
গঙ্গা পুণ্য পারে।
পিঞ্জুরা বাগিয়া মন পাহিয়ায়
মনর ভিতরে ফরদের।
হাগর উদাম বৌয়ে সকোসকো হৃদিগ কাদের।
কতি দূরেই ঔ ফাম,
তর পূণ্য ধাম,
আহিগি মেলিয়া নাদেহুরি।
কালাক-পেলয়া দেহিঙ নে তরে
হৃদির আহি মেলাদে মরে
এহান মাগুরি।
পিঞ্জুরার মন
না চিনের ধন
হিন দুক বারিত পলার।
তরে দেহানি হৃদি মেলানি
জ্বালা নেয়া কিসাদে মনার।

জানুয়ারি ২৫, ২০২০

 

লৌনাম

লেইপাকে যেতা আসে
খেলাফামে দেসত তা।
এরে কথা চুটিহান পাহুরিয়া
নাপালে মি পরেসুতা।

দিদিনর খেলাফামে
লৌনাম নাঙে মাঙে,
মুলুকর লেইশাঙে
মাঙসেঙ মাঙ আতে
জাতজাত খেলাজাতে
বন্দির বেরিফঙে
দিশানেয়া আদাপথে
উঙপাঙে পরেসুতা।

মেলেসে হে মেলেসে চা
সেইত্যর আহি চাতা
মুলুকর মেঙসেলে।
খুটিনেই য়ারি উতা জাপেসে চা
রাতিকার তারাজপা দিনকার বেলিমেলে।
আনা যানা সিনা পানা
বৈঠালো ঘাটে বনা,
সেইত্যর পাল্লালো
বেপারিগো পাক্কাগো,
বাসাসে চা ঘাটে বয়া,
দিদিনর খেলাফামে
লৌয়েল লৌনামে
আপ্পানে পরেসুতা।

ডিসেম্বর ১৮, ২০১৯

 

হংস বাহনী,(অক্ষরবৃত্ত মুক্তক)

লেইসা চুলে মকর-কুন্ডলে
বেণা আতে পদ্মসিংহাসনে
ত্রিনয়নী দলা কুশাসনে
বহেসে যেসাদে হউপন পুরিত
নূয়া ডেম থরো ইকর সুরিত।
কন্ঠে তেইর মেয়েক সাগর
বাটলে না কমর——
শূণ্যতা পূর্ণতা জ্ঞান অজ্ঞনতা
খামতল সিমানা লালফামি
হংসবাহনে চরণ-হানি।
থমথম করের টেইপাঙ মাটি
যজ্ঞ মন্ত্র রৌয়ে।
ফরফর করের টেইপাঙ যেসাদে
করপেক বৌয়ে।
টেইপাঙ মিমাঙে আজি হারৌ মেলা।
চিকয়া হৃদিয়ে ভজের মন্ত্রর মালা।

জানুয়ারি ৩০, ২০২০

 

নালেপ্পামেয়েক

না ইকরা ইতিহাস
নালেপ্পা মেয়েকে
জনম আহান দিল
পথর মেরাকে।

কালি বুজা কলমর পারেঙে পারেঙে
না ইকরা ইতিহাস
না লেঙকরা তালে
নূয়া রাগো লেঙর চা
দুখর টেঙারা মেয়েক আকারর মা,
না ইকরা ওয়াহি।

কালি ফোটা পরের চা
মিঙাল সকয়া
মেত্তমকার বেলিহানে
টেঙারা গলেয়া
জনম আহান দিল
না লেপ্পা মেয়েকে
না ইকরা ইতিহাস ডেরি ডেরি পাতা
করপেক হাজাদিল
না লেপ্পা মেয়েকে।

ডিসেম্বর ৩১, ২০১৯

 

নূয়া রাগো

কিহান দেকলু আহিগো মেলিয়া
বিয়ান বেলির ঙালে।
হুনার কান্থা জাপেসে মাটিয়ে
আজি এ বিয়ান কালে।

রাতিকার তেরা এবাকাউ হাগে
করের মিঙাল দাবি।
টেইপাঙ মাটি পাহিয়া মুলুক
আবিজাবি আসি হাবি।
ঘুমর আহিত কেজার পাতায়
মলয়া বৌর ঠেলা—–
আয়া টেইপাঙে মিঙাল এহান
রচাসেতা এতা খেলা।

নূয়া রাগো আগো মুলুক জুরিয়া
নুংশি হেকর তাল।
পাহিয়া পলির কিচির-মিচিরে
রচের তাল-বেতাল।
খেওয়ানিগো ঘাটে নূয়া খল্লিকে
অরার বেজান এলা।
বাটিয়ালি হেকে যৌবনে মাটি
খেলার মাতামবালা।

টেইপাঙে আজি এ হাগর তলে
কিহান দেকলু ঙালে।
নূয়া রাগো আগো রচাত লাগেসে
হাগ এহানর তলে।

ডিসেম্বর ১৭, ২০১৯

মন্তব্য করুন

Fill in your details below or click an icon to log in:

WordPress.com Logo

You are commenting using your WordPress.com account. Log Out /  পরিবর্তন )

Google photo

You are commenting using your Google account. Log Out /  পরিবর্তন )

Twitter picture

You are commenting using your Twitter account. Log Out /  পরিবর্তন )

Facebook photo

You are commenting using your Facebook account. Log Out /  পরিবর্তন )

Connecting to %s