শিরোনামহীন কবিতা কতহান

ফিচারড

samar১.
ইং বৌআহান বায়া আহের কামাখ্যার গরেৎত
তপ্তা নিংশ্বা আগ সালসে লামরদৌগর উগদে
বৌদ্বিয়হানে পথর হাদিত্‍ উনা অইলে কলকরিয়া দরতারা আহানে আহানরে
ঔবাকা কীর্তনর রাগাগ অকরানি পাহুরিয়া চেয়া থার রামসিং অজায়
দেহের, তানুর ঠইগর পাহিয়াগী ফরদিয়া সালসি মহাপ্রস্থানর পথেদে
যেপেই কুকুর আগ মরিয়া আসে দ্বাপরর আগেত্ত।

২.
যেপেই আসু, ঔ বিষ্ণুধাম, কবি আগর থানার ফামহান
তাপকরে, যেগই মাতল, উগরে মি নাচিনুরি
তার মেইথঙহান লপুক আগর বৌহানর সাদে
আহিদ্বিয়গীর প’গী লপুকর জিনজিনি
কবিগ নাগই মি তে
উহানল বিষ্ণুধামে আয়াউ বিসারাউরি তরে
তর গারীগর গতহান যেপেই নেয়র, উপেই মি কিসাদে থাইতৌ, মাত্‍ !

৩.
বিয়ান এহান তার মেইথঙহান
ঙাল গত আগ আহের মঙ্গলারতির পিসে
আরতি যেগই দিরী, গিথানক উগর আহিগী কাপানার সাদে
এলাহান লালয়া আহের বৌহান, তেইর মুকসিহানৌ
মি মুকসিহানর উবেদে চেইতে চেইতে দেহুরি গেলগা জনমহান কাতকরেসিলু তেইর আতহানাত্‍
এবাকা ইনাফিহানে গুরিয়া থসে ঔ আতদ্বিয়হানি
মালঠেপগ বুজেসে বিয়ানহানর মিঙালে
মিঙালহানরে কিয়া কৃষ্ণ বুলিয়া ডাহিরী?
অমাটিক গইগ অয়া?
সমরজিত বুলিয়া আকখুরুমতে ডাহকনে!
বিয়ান এহান চামইল অইস মেরার পালির দিন এতাত্‍।

৪.
গত আগ সিলসে
ওয়াঙেদে
উগদে কুঙ্গ আসে?
মি যেপেই আসু, উহানরে কেন্দ্রগ নিংকরলে, তর গর আরাকৌ খাবেদে
গত উগ আহেসে উগদেত্ত
গঙালার এবাকা
সিঙারেই নাগই
লেহাউ থামপাল নাগই
গত এগর লগে পান্তাম্না দেনার কিতাউ নেই
হাবিয়ে আংকরতারা, গত এগ কুরাংত আহেরতা?
আগরেউ না মাতেসু,
গত এগ তোর য়াবেরুনীহানর তলেত্ত আহেসে
আজি পূর্ণিমার জুনাকর লগে ।

৫.
লক্ষ্মীতে কুঙ্গ?
আগই আগরে আংকরের।
মি ডরপেয়া মাতে নুয়ারলু,

আমার এইগার জিলক লক্ষ্মী
যেগর অটগীত আকদিন মি…থাক।
পূর্ণিমার দিন উহান আজিঔ আহেসে
তেইর খুনু দ্বিয়গীর তপ্তা উম ঔহান এবাকাউ গারীগত উপৌরি মি
পূর্ণিমার রাতি এহান আইলে মিঔ চেয়া থাউরি লক্ষ্মীর উবেদে ।

৬.
কলকরতেই পাউরি বুলিয়া চেপসিলু কাদাত্‍
চিতারা মেকুর উগর সাদে
রাতিহান গেলগা সুলেদে
দিনহানৌ
কলকরানির কথা এরে দিলু
আহেসিলু উহানরে পেয়া নাচেইলে আলথক অয়া
কার ফুতিহান দরিয়া আসত্‍ বয়া ?
কুংগদে চেয়া?
মাকড়র জমে নাথার পুরাণা দিন
মেকুরগ অলয়া মি তর উরতহানর গজে থসু আতহান
উগদেউ খিয়াল নেয়সে
কার য়ারি খালকরৌরীত অমাটিক গইগ অয়া?
গেলগা জনমর য়ারি ?
গেলগা জনম থাক,
দ্বাপরর আহিদ্বিয়গীল তরে কলকরিয়া আহেসু মি
নখর চিন চেইস তি,
এবাকাউ আসে খইতুগর তলেদে,
নুনর সেয়াগত্‍।

কবিতা ঠইগ’

indexকবিতা তি মোর ঠইগ’
যুগ যুগ লেহে কতি নিঙে
ডাহেসিলু তোরে হোপন-টেইপাঙে
হাবিরাংত তোর সাদ হোভা,
মওং মাজা থমক কাকেই
নারগও কঙালা কতি
হে সখি! উপমা দিন ফাম নেই।

মনহাকহানাত বরোণর চাকা
বেলির মিঙালে ধরের রাঙিয়া
বলগায়া হাদিত, হাদিরমা আন্দুকা
যারগা তাহে তাহে এপারেত্ত
হৌপারে অসীমে কিহান না জানু
হৌমা যারগা পহর না আধারে।

তিতে কিন্তুমান ঠইগ’। জুরাগ’ মুকেয়া
এরেদিয়া দীঘল চুলসপা
বরোণর হাদিরমা কেথক খেলাউরী
মোর তুল’ ক্ষনে মুক্সি, ক্ষনে ক্ষনে
কাদিয়া রহিয়া কিহাস মাতউরী
মি আপাঙে হারপা’ নারুরি।

সুপ না টটরেয়া আসে তোর জয়
তোরাং মি টটরেয়া করলু পরাজয়
আজিপেয়া; বানানুংশির এহান রীতি?
তোরকা হৃদিগৎ পাতেসু আসন,
ডাহুরি হামজি বহেদিয়া আয়-
বুলতে কাদাত থায়ও দুরেই অউরি তি
চেনে নারলু হুত্তমেউ বিদ্যাধরী তোরে।

তোরকা করলু হন্না পালি মাহি
কিন্থুমান নাহিলে মোরগো অয়া
আজি পেয়া ; লিরি লিরি দিয়া
হৃদির পিঞ্জরাগত্ত নিকুলিল কতি
মাতিল কথাগো মাহি, এলাদিল এলা।
কিন্তুমানে পাজালেয়া ইমার ঠারে
নারলু মাতানি তোরে’ দুঃখ এহান।
মুকাদিয়া আয় মোর গাঠি হাবি
নিকুলিঙ তেজ বীর্য বৈভব হাবিল’
ইমার সেবাত থাক তি মোরতুল’
মাতিং লৌদে তি মোর কবিতা ঠইগ’।

কাহের

গাঙ দ্বিয়হানির বুকগৎ কাটাতারর বেরে
য়মদিয়া আছে রিফিউজি লত্
চিকফেইর সাদে গজেৎত লাল্লাম ঠুনিংস্বা, খৌরাঙ
বার পাংকাল
আবেরা বৌহান মুঙেদের পৌ নাপাছে
দ্বিয় বারার লামুই-কুকুর শিংলুপর এলা দিতারা
ৱাইসাঙনি! কুংগদেথাং?
জ্বির মেইপুল হাবি বাসেয়া আছি জিনজিনির সালে।
ৱাইসাঙনি! আহেই, সালইক
বৌবুলন আহের।

জীবন ১

ঘটনায় হে জীবন, মাঙ যিতয়গা!
নামনেইলেউ প্রিয় ফোটা দুগ হক
ডিফা আহির পানীল! মেইথম চক
গাল তিঙা তিরাষর ডক কককগা!
আয় মারুপ যিকগা বলে, মনে মনে-
তেঙয়রী ফাগু-লয়া কালাচিংখেয়,
জিনার এলায় কুঙ্গ? অমৃত-সা প্রাণে-
প্রাণর য়ারি হাজেয়া থার আকপেয়।।

তোর আহুল-কাকেয়ে আশার মঞ্জুরী
লেপসে! অবশ্যম্ভাবী রতন সম্ভার
চিককরে দাকানল-  ত্রিনেত্র কঙ্করী।
‘না’ বেলেয়া আশারমা যুগ সমাহার
বেরুয়েয়া প্রতিশোধ কালরে কালর
আটিংগা রহুয়েয়া ইন্দ্র-সরা-লর।।

ভাষাচিন্তা

এসাদে এসাদে সিংহ আগ আছিলতা
সিংহতে কিতা?
সিংহ মানে ‘লায়ন’

এসাদে এসাদে লায়ন আগ আছিলতা
………………………
ইতি মোর নাঙ “ধরা”।

এসাদে এসাদে সিংহ আগ আসিলতা
সিংহতে কিতা?
সিংহ মানে ‘লায়ন’, আমি নংশা’উ বুলিয়ার

এসাদে এসাদে নংশা আগ আসিলতা
………………………
বিষ্ণু বিষ্ণু ,মোর নাঙ “দেবলা”!

গগা রাজার এলা

আমার কহা এগরাংত ডাঙর সাগর নেয়ছে।
আমার রহন হুনতেগাতে আরতা হাবি লেয়ছে।।
গাতগ বুজে ডাঙর অয়া আছু এহান নাখেখলাই।
করিল কামতে আকতাউ নেই. মেইক্খু অয়া কৌলিত থাই।।

খয়াত ইমার

চরণ খয়াত তোর দিয়ৌরি মি হমা;
দোষ-ত্রুটি, অপরাধ করেদিস ক্ষমা।
করাক কবিয়ে আজি সেঙ-পুঙনিঙে
কাতকরৌরি কবিতা হাবি তোর নিঙে।
কাবিতারূপ খুত্তল লদে অয়া হারৌ
কিতা আর দিতু ইমা নাকরিস য়ারৌ
মাঠিয়াদে পুতকরে ‘পুনচি পালক’;
ইমার সেবালো মোর জীবন কাটক।
নাচাউরি কিত্তাউ মি মোর এ জীবনে;
জনম জনমে আনা ইমার চরণে।

বানা

মি তোরে পাউরি কতি বানা; পানতা’য়া
নেই, কালা মেইখুম্বি তেবৌ মুরে তোর;
কালা মেঘে ধলা শশী পূর্ণিমার। মান্না
হৃদয়, পুন্নিংপা প্রেম। তোর সালে মোর;
লিমগো ইমে পুঙখাক্ । আজি লেইতান্না
করুরি পুন্নিঙে,  ঠাচা, যেহানে বিভোর
অসু মি; ধ্যানি তপস্বীভ নাদিনে তাড়ান্না
অচেকপালে, লেইপাকে থার উতা অর।

অরিঙর আহি নতুবা থাম্পাল-যুগল
সাতসে, কাজল রঙর পিচুম, যেমন
মেঘখন্ডরেউ জিঙে। হাগর তেরাই
হাজাদেসি খাটলগো; ইনাফিরাচল-
-জিঙিয়া তপনে, ইন্দ্র’ গেহউ তেমন
নাগৈ. খুচাপীর বারে জিঙেসতানাই!

ছড়াপর্ব্ব (খ-ছ)

খ.
খলসপাহাৎ কলার লৌহান
নার মজিয়াউ কানা
বাদর দাপা মালিক থাংতে
ভাগ কীসাদে পানা।

গ.
গম ফলিয়াউ খানারতা গম
নুয়ারল থনা গপেশে
গম-গমাগম করে হাবি গম
লইল বেপারী গনেশে।

ঘ.
ঘরগো থয়া বারে গুমার
কিহান ইসে থাং
নিজর ঘরে পরার মানু
মালিক ইসি থাং ?

ঙ.
ঙাচিক গরে ঙাহাক আহান
ইঙ্গ অনা দেই
সেপহান করে হিঙ্গি ধরিয়া
অবশ করে দেই।॥

চ.
চন্দন পিদে হরি বৈষ্ণব
গাঙে গাঙে সালসে
হরি হরি বুলে বুলে
পয়সার ব্যাগগো পাতেসে।

ছ.
ছয়গরে তা নয়গো করের
দিয়ো আতে বন্দুক ধরের
গাঢ়পা আহিং পিদিয়া থার
মানুর পানা দেনা নাচার।

কান পাতিয়া হুনুরি

ফিচারড

Dils Lakshimindra Sinhaকান পাতিয়া হুনুরি অন্তরর কথা
‘বল্মীক’র ভিতরেত্ত ‘রাম রাম’ নাং
অঙ্কুরিত বীজর খৌরাঙে
হৃদির বানা প্রেম প্রীতি
মহামহীরূহ অনার হপন দেহিয়া আসি।

হারৌপা থাম্পালর পুংনিঙে
বিলাদেনা চাউরি
বুকর উম জীবনর পৌ…

মি মলয়ার তুল’ তিলয়া গেলুগা
মানুরাংত অন্য মানুরাং
দেশ আহানাত্ত আর দেশ আহানত
আরাক মহাদেশ আহানাত
সাগর আগত্ত আরাক সাগর আগত
আরাক মহাসাগর আগত
গ্রহ আগত্ত আরাক গ্রহ আগত
অন্য নক্ষত্রর বেদে।

কিন্তু হায়!
মি চেপউলে মানুও হিল
হৃদিও পাষাণ,
পানি হুকের, জ্বি নিভের
মি কাইলে
হিমালয়গ গাতর
.             সাগর হঙর
কি লাংলাহান!

খৌরাং

samarমেয়েকহাবি ছালি অ’যারগা
পাতাহান দলা ফেইচমহানর সাদে পরিয়া আসে।
ঔপেইকার ঠুনিংশ্বা?
মেয়েকর, না মর, মাতে নুয়েইলু।
নিংশিং অইলু, এসাদে করিয়া ইমারেও
ছালিগ অইতে দেহেসিলু বরণর মাদানে।
পিতৃলোকর আহির পানি বরণ অলয়া মাদানহান বাহি পরিল।
মি না কাদিয়া চেয়া আসিলু ইমারে।
মেয়েকর সাদে ইমারেও পুরেসিল জ্বিগই।

মরেতে কুনদিন পুরতৈ?

উজ্জার নাজ্জার

লমং বুলল কুমেই-আহার রাগাগদে চেয়া খল্লিক আগ জিংতা অনা চেইল পারা, আকমু করে ভাবক হাবিক ঘুম-মাঙনার রাতিনঙেইর চপ্ ক উবা আহির পাতার তলে গিয়া তিঙে তিঙে থানার হপন, জিঙে জিঙে যানার হপন… আহং বুলল মাতৌ অহার ওয়াহি অগির উমে জারে বিবুলা ইল একাল-ওকাল, আকাশ পাতাল।

না দেহুরি আহিগত মিঙাল আহান

না দেহুরি আহিগত মিঙাল আহান
তর মেইথঙহান?
জারহান জবর অইলে কলকরিয়া দরিস
তর য়াহানর খুনুগী উবাকা মরে উম আহান দিতাই
তপ্তা নিংশ্বাগ তর গারীগ সকয়া যিতইগা সরারেলর গরেদে
সরারেল মাতলুতা লাসপেয়া
ফাম উহান কুরাং তি হারপাসত্‍ হবা করে
কলাথর মাল তর উরুহান উবাকা নাসানি অকরতৈ মর আঙুলির তালে
খানি গজে দুবগাসি নুনর পানিত্‍ মুর জাবুরিয়া বাসেইতাই উবাকা

না দেহুরি আহিগল দেহুরি মি, তিঐ অল যাউরিগা সরারেলর রাণীগ
তর কন্নুঙে হমেয়া জারহান যারগা,
ঔরে চা, সিলেট বর্ডাল লালয়া আরাকৌ দূরেইত্‍
মিঙাল এহান আহিগত্‍ত শেসেয়া তর ঠইগত,
খুনুগীয়ে তানুর পাখহানল হাপদিয়া দরেসি মরেউ।

তি মাত্‍, মরণ এপেই আয়া আকখুরুমতে মুরগ নঙেয়া থাইতই নাই?

চিকারী

কই, কুরাং ক্ষত্রিয়র গান্দিব ধনুক
মহাবীর ভীমর গদাগ কুঙ লপুকে
কুঙহাত আছে পান্ডবর রথহান
পঞ্চপান্ডব সারথী রুহ  মইপঙগ
হস্তিনার কুরুক্ষেত্র লপুকর বুকগৎ
দিন জিলকা খুচুখুল্লেই আনেদেনে।
দে বজ্রচিকারী গদা ধরিয়া এবাকা
প্রলয় কর বিকোধর ভমি লপুকে
গান্ডিব ধনুকে জুরকার লালফামে
উঠেই গাওরাপা জাতর মহাকামে।
গার্জিয়াই হাত’ সালৈক আহ মুঙেদে
আমি জাতর লালফামি সিবাই হাত’।
ধরেই খুচুখুল্লেই এ প্রলয় দিনে
আহো যুবক ঙালকরিক ইমারঠার।

কন্নিংঙহানি

কন্নিংঙহানি খতকরিয়া থইলু কৌটা আগৎ, তি আহিলে কাঠিনকুনচন্দনে বামুনশৌগ পারা, মিয়ৌ সেঙ-সেঙ ইয়া সেঙসেঙর খিরি আগণো পানি নিয়া তুলসীপুঙে সিকদেয়িমকা করে, এ জরমে দিনএহানি করজোড়ে আহির পানির মুর গাতিয়া গেলগা, রাতি ইলে বিয়ান ফুইলে হাবির আগে কুকুর আগই তুলসীপুঙে আয়া… কন্নিঙহানি লুকিয়া থনা নাইব!

হৃদির পিরণ

বানাত কললিং!
হে নিষ্ফল আহির পানি
কাদানির জুরণ খামেইতৌ নারলে ঠেমনি
নান গারিগোর সানে কঙালা শব্দ
এবাকা যন্ত্রনার বৌ
বাক্য উঃ! উঃ! .., খইনুত অমৃতর নাঙে হু
অন্থকপা পিরণ, নিংশ্বা ডিফা হক
রৌ মেলিয়া … নার বাগিয়া
চামনির দিন আহকনে মুঙেদে
ছালি নাছু পেয়া বিধাতা বরণ ফুটা আগো
বেওয়াফার মুকুট পিদিয়া আটানি তোর
গড়েইপার মায়াজালে হৃদি অকারে ঝঙানি
তেবৌ বানাপা, আরো জিঙে খৌরাঙে
কিন্তুমান বসন্তর উনাউনি কিসাদে
শাতনির আগে কুড়ি ঝঙলে।

জিনার এলা

দিন আহান, রাতি আহান
বারো আরাক দিনআহান।
মোমগর সাদে কেলো কোলো যারগা

জিনার আঠুম্পা খৌরাঙ অহানলো
আমি হাব্বি নংপাঙ।

রাতি নঙেয়-নঙতলে বারো
টিকটিক বেলিটিকে
ঠুনিংশার হাদিয়েদে জরম অর
কুত্তিরাং আশা

জনমকার হপন আহানলো সালসি
নিজরাং নিজে পলা পলা
নাপ্পাল করিয়া
আকাম্পা মুক্সিলো
জিনার এলা দিয়া।

য়ারৌ

হপনে-হপনে ইমা। উঠানে বহে’য়া
মাঠিয়েয়া চুলে মোর এ গালে, নিরালে
নিরলে কাদুরি তিতে কিহান মনেয়া?
থাক তোর কানানেই বান। থেদেসিলে-
মোরে তিনা হ’ বনবাসে, কিতার ত্রাসে?
কনাক-পাগল-শৌগ’ অনাথ-অবুঝ,
বনর কঠিন পথে মাম-পরবাসে
কুরাং কিহান অইল করেসিলে খুজ?

কতকাল-অমারাতি হারা-নিদ্রা-ইন্দু;
আনৌগ’ চরণতলে অহল্যা-মাটির-
নিবেদিয়া দেহাগর তাঙ-রাঙাবিন্দু
তোর পটা পাসুতাহে জোনাক থাচির।
হপনে-হজাকে তেব’ পেইলে “হোভাতা”
অজান্তে কাদের রিদি- “মণিপুর নাতা!”

উহানল’ মি যাউরিগা

চেকর বেরর ভিতরে থায়া থায়া
মি মাটিহান, মাটিহানর রঙ
হাবি পাহুরেছু্ চারিয়বেদে লোয়ার
হিনচাপার বিকট আর্তনাদ মানুর
আতে পড়িয়া। তানুর কালা
ঠুনিংশ্বায় হাকহান বুজের, হাকহানর
নীলিমা গুরেদের। এপেই বরন বারো
জারর পর ছাড়া অন্য পরর
আনাগোনা নেই। হাবিতে ডরেয়া হুদ্দা
মেইথং দেহেয়া যিতারাগা। পাহিয়া পলির
রৌ নেই। চারিয়বেদে হুদ্দা
মানুর ঢৌ। মি নিংশ্বা মাঙৌরি।

উহানল’ মি যাউরিগা মেরাক
মেরাকে উপেই, যেপেই হুরকাং
ছড়াহানর হুরকাং ছণর ঘরশৌ
আগর কাচা মাটিত মি দুনিয়া
এহান দেহেছিলু পয়লা। যেপেইর
লেংটা সারল্যর মুকসিত ভাহিয়া
যাউরিগা মোর জীবনর হুনার যুগ আহানাত।
মহা, মাছি, ধুলি, বালি, অরে বারো
গাছর ছেয়ায়, সাঙ লপুকে, পাহিয়া
পলির রৌয়ে মি নিংশ্ব বেলেইল
ফাম পাউরি। উহানল’ মি যাউরিগা।

ফিলগুড

“…my father, let my country awake”
.                                                       -Rabindranath Tagore

হিঙর আলির দৌর লগে লাকাটি আর কইদিন?
জনম এহান সিসিফাসর লালফাম।
.                        হুদা খের বারো হিলর লুমপাক।
গোধরা বিহারি নিধনযজ্ঞর জ্বি ফুরেয়া গুমজিতেগা
শাড়িকান্ডর নাগই-হপন – নিরীহ মুরর ঘিলু ফাটের পুড়া আলুর সাদে।
ক্ষীর-মাখনর গিল্লা খেলাৎ সুনুসাতু অর জিনার হপন
দুঃখর গতে খইতু লাঙর ইসাং ধার আত্মাগ।
মৌলবাদী শিরাপে বেলিহান গং ধরেসে
জোনাকর মিঙালেউ বিদেশিনী গঃ।
ইনচিকচিক সমেইর গারিগ খতকরিয়া পিত্তিরির লৌ
ফি-ল-গু-ড-ফি-ল-গু-ড-

আহির পানির পথেদে গড়াগড়ি দিতারা
কঙ্কাল শৌ
রম নেই কুকুর
বারো
ভিক্ষারী সম্রাট।
ফিলগুড।