খাসিয়াগ

ফিচারড

খাসিয়াগ
পানা বেসাত আহেসে,
পানা মুঠাগ
মোর আতহানাত দিল ।

মুকেয়া চেইতে
বড়ি আঙুলির ডেকি পাতা শৌ আহান
উতাৎ হমাসে ।

আংকরলু ——–
এ পাতা শৌ এহান
লেহাৎ বড়াসৎগ ?
উত্তরে মাতল
হায়——-
বেলানি বানা পেয়া
লেহাৎ বড়াসু ।

বানানুংশি প্রেম নেয়ইলে
পৃথিবীহান নেই।

শিরোনামহীন কবিতা কতহান

ফিচারড

samar১.
ইং বৌআহান বায়া আহের কামাখ্যার গরেৎত
তপ্তা নিংশ্বা আগ সালসে লামরদৌগর উগদে
বৌদ্বিয়হানে পথর হাদিত্‍ উনা অইলে কলকরিয়া দরতারা আহানে আহানরে
ঔবাকা কীর্তনর রাগাগ অকরানি পাহুরিয়া চেয়া থার রামসিং অজায়
দেহের, তানুর ঠইগর পাহিয়াগী ফরদিয়া সালসি মহাপ্রস্থানর পথেদে
যেপেই কুকুর আগ মরিয়া আসে দ্বাপরর আগেত্ত।

২.
যেপেই আসু, ঔ বিষ্ণুধাম, কবি আগর থানার ফামহান
তাপকরে, যেগই মাতল, উগরে মি নাচিনুরি
তার মেইথঙহান লপুক আগর বৌহানর সাদে
আহিদ্বিয়গীর প’গী লপুকর জিনজিনি
কবিগ নাগই মি তে
উহানল বিষ্ণুধামে আয়াউ বিসারাউরি তরে
তর গারীগর গতহান যেপেই নেয়র, উপেই মি কিসাদে থাইতৌ, মাত্‍ !

৩.
বিয়ান এহান তার মেইথঙহান
ঙাল গত আগ আহের মঙ্গলারতির পিসে
আরতি যেগই দিরী, গিথানক উগর আহিগী কাপানার সাদে
এলাহান লালয়া আহের বৌহান, তেইর মুকসিহানৌ
মি মুকসিহানর উবেদে চেইতে চেইতে দেহুরি গেলগা জনমহান কাতকরেসিলু তেইর আতহানাত্‍
এবাকা ইনাফিহানে গুরিয়া থসে ঔ আতদ্বিয়হানি
মালঠেপগ বুজেসে বিয়ানহানর মিঙালে
মিঙালহানরে কিয়া কৃষ্ণ বুলিয়া ডাহিরী?
অমাটিক গইগ অয়া?
সমরজিত বুলিয়া আকখুরুমতে ডাহকনে!
বিয়ান এহান চামইল অইস মেরার পালির দিন এতাত্‍।

৪.
গত আগ সিলসে
ওয়াঙেদে
উগদে কুঙ্গ আসে?
মি যেপেই আসু, উহানরে কেন্দ্রগ নিংকরলে, তর গর আরাকৌ খাবেদে
গত উগ আহেসে উগদেত্ত
গঙালার এবাকা
সিঙারেই নাগই
লেহাউ থামপাল নাগই
গত এগর লগে পান্তাম্না দেনার কিতাউ নেই
হাবিয়ে আংকরতারা, গত এগ কুরাংত আহেরতা?
আগরেউ না মাতেসু,
গত এগ তোর য়াবেরুনীহানর তলেত্ত আহেসে
আজি পূর্ণিমার জুনাকর লগে ।

৫.
লক্ষ্মীতে কুঙ্গ?
আগই আগরে আংকরের।
মি ডরপেয়া মাতে নুয়ারলু,

আমার এইগার জিলক লক্ষ্মী
যেগর অটগীত আকদিন মি…থাক।
পূর্ণিমার দিন উহান আজিঔ আহেসে
তেইর খুনু দ্বিয়গীর তপ্তা উম ঔহান এবাকাউ গারীগত উপৌরি মি
পূর্ণিমার রাতি এহান আইলে মিঔ চেয়া থাউরি লক্ষ্মীর উবেদে ।

৬.
কলকরতেই পাউরি বুলিয়া চেপসিলু কাদাত্‍
চিতারা মেকুর উগর সাদে
রাতিহান গেলগা সুলেদে
দিনহানৌ
কলকরানির কথা এরে দিলু
আহেসিলু উহানরে পেয়া নাচেইলে আলথক অয়া
কার ফুতিহান দরিয়া আসত্‍ বয়া ?
কুংগদে চেয়া?
মাকড়র জমে নাথার পুরাণা দিন
মেকুরগ অলয়া মি তর উরতহানর গজে থসু আতহান
উগদেউ খিয়াল নেয়সে
কার য়ারি খালকরৌরীত অমাটিক গইগ অয়া?
গেলগা জনমর য়ারি ?
গেলগা জনম থাক,
দ্বাপরর আহিদ্বিয়গীল তরে কলকরিয়া আহেসু মি
নখর চিন চেইস তি,
এবাকাউ আসে খইতুগর তলেদে,
নুনর সেয়াগত্‍।

কান পাতিয়া হুনুরি

ফিচারড

Dils Lakshimindra Sinhaকান পাতিয়া হুনুরি অন্তরর কথা
‘বল্মীক’র ভিতরেত্ত ‘রাম রাম’ নাং
অঙ্কুরিত বীজর খৌরাঙে
হৃদির বানা প্রেম প্রীতি
মহামহীরূহ অনার হপন দেহিয়া আসি।

হারৌপা থাম্পালর পুংনিঙে
বিলাদেনা চাউরি
বুকর উম জীবনর পৌ…

মি মলয়ার তুল’ তিলয়া গেলুগা
মানুরাংত অন্য মানুরাং
দেশ আহানাত্ত আর দেশ আহানত
আরাক মহাদেশ আহানাত
সাগর আগত্ত আরাক সাগর আগত
আরাক মহাসাগর আগত
গ্রহ আগত্ত আরাক গ্রহ আগত
অন্য নক্ষত্রর বেদে।

কিন্তু হায়!
মি চেপউলে মানুও হিল
হৃদিও পাষাণ,
পানি হুকের, জ্বি নিভের
মি কাইলে
হিমালয়গ গাতর
.             সাগর হঙর
কি লাংলাহান!

দুঃখ

ফিচারড

শূণ্যহানাৎ শব্দ আগরে মাৎলুঃbrajen
যাগা, থামপালগ অয়া শাতগা।
নিঙল আগরে মাৎলু- যাগা,
ঔগর লগে চন্দ্রকলার সাদে পারাহান দিয়া উবা
অগা।
তোর মেইথংহানাৎ জঙক লিক লিক করের
আহির পানির বিন্দু আগ।
ঔতার ঢউগৎ স্মৃতির সাদে নিক্করতৈ
থামপালগ।

থামপালগ! তোর নাঙহান কিহান?
ঔগৈ বিষাদর হাদিৎত মুকসিহান দিয়া মাৎল-
মোর নাঙ- দুঃখ। মোরে নাচিনর থাং!
কনাকত তোর মারূপ অয়া আছুগ।

অকরলো খেলানি বাছুরগীর লগে

ফিচারড

জারহানে খিট খিট নিককরের মৌ আগো
গারিগৎ ইমৎমৎ আঙেইশৌ আহান-
মাপহানাৎতো ইল হুরকাঙ;
পথগৎ বয়া আছে
রইদহান হবেহে পড়ে আহের।

বুজন আগই
গুরু কতগো ডিগারা দেনাৎ নেরগা
গুরুগীর লগে বাছুরশৌ দুগো
সারাৎ খেলতারা তিরিং তিরিং
শৌ উগই বাছুরগী দেহিয়া
লগ দরলো- ধাবদের, অকরলো সারাৎ খেলানি
তাঔ
বাছুরগীর লগে।

এবাকাউ মেঘ

ফিচারড

5100_123948419045_4568043_n

এবাকাউ মেঘ তোর সালে পৌ নেরগাতা অলকাৎ
কতি দেশ, কতি সময় লালয়া মিলন স্বর্গহানাৎ
আহির পানিল তিঙিয়া আছৎ, ফুলর লেহেয়া দিন,
বিরহ লালয়া পানা নাই তোরে, এপেই নেয়ছে চিন।

চারিবেদে আজি মত্ত বরণ, বিজুলীও ঝলকার
দুঃখহানরে গাঢ় করিয়াও কাদিয়া কাদিয়া থার।
দ্ব’গীর আহিৎ জঙের পানিয়ে সমুদ্রজান অছে,
এপারে মি আছু, কতিঔ  দুরেয়ে তোরো কাদুয়েয়া থছে।

নি:সঙ্গতা তোরে নিংশিঙ অয়া

FB_IMG_1596022174481

নি:সঙ্গতা তোরে নিংশিঙ অয়া
মি দূরেই দূরেয়েদে গিয়া ফৌঔরিগা
পথ-গাট লপুক-বন সাময়া টেঙারার বিতরেদে আটিয়া
হাদিতৌ বার যাউরিগা পৃথিবীর কক্ষপথেদে
ইমে আকখুলাগই!

পথেদে  যিতেগা যিতেগা
বন-বাগিচার গলিয়েদে
পারেঙ পারেঙ অয়া যিতারাগা কামজারি নিঙল বার
টেঙারার পাদদেশে নামিয়া আইতারা
উপজাতি নিঙল বেয়াপার হাদিৎ তোরে
কতি বিসারলু!

নি:সঙ্গতা
মিতে তোরে বিসারেয়া হাদি হাদিত
রাতিকার উপসাগর লালয়া
পৃথিবীর হৌমুর ফৌঅউরিগা
তেবঔ তোর বুকগর সাইবেরীয়ার ইঙ বউহানে
আনিয়া আহেসে মৌসুমীর দেহা
নাপেইলু!

তেবঔ তোর হুৱাংহুর ইন্চিক চিক পানিহানাত
রাতিকার তেরার হাকহান লামিয়া আয়া
জলকেলিল মত্ত অয়া আসি
তেবৌ মোর এগদে আর বুলন দিয়াও না-চাদিলা
কিন্তুমান নিংশিঙ অইস নি:সঙ্গতা
তোরে নিংশিঙ অয়া মোর ভাবনা এতা
কথা টটরতারা চিরদিন মিঙাল বার ফুলর সাদনে।

(‘চিংলাই হিংগালার য়ারি বার নি:সঙ্গতা’ কাব্যগ্রন্থত্ত )

আর কে ভোলা সিংহর কবিতা

20200729_172041

অভিমান
মাতের করিয়া ঠিস্ বৌহানরে ভানু ৷
মোর মিঙালে পালসি জীব বার মানু ৷৷
হমাদিস সাজারাঙে দিন রাতি মোরে ৷
মি নেইলেতে থাই তেই নিততিকা আধারে ৷৷
জ্বিগর সানে সওয়া মাতের পবন ৷
অভিমানে দিনে বয়া দেহর হপন ৷৷
মোর সানেতে পাঙ্কালপা মালেমেতে কইগ ?
মি বিনে এরাদিতেই মিকুপেই ঠইগ ৷৷
হুনিয়া মাতের সেঙ্ক  ডাঙরিয়া বেলি৷
উসিত নাকরিয়া তি লাগরতাহে কৌলি ৷৷
চেইক দেয়াতা সিংনা মোর তুল আয়া ৷
উরেসে সউ এগর ফিজেত্ উরেয়া ৷৷
হু হু করে লঙলেইগল বৌরাজা আহিল ৷
বৌহানর জারনহানে গাছউ নঙিল ৷৷
থুরথুরেই কাপিল মাটি বাড়ী ঘর ৷
ফিজেতহান নাহে ইল সুপ লর চর ৷৷
এফির উঠিল বেলি বলিল সিংনাত্ ৷
রইদহানর ফাপগল করের পাহাত্ ৷৷
খুল্ল হাবি সউগয় গারির ফিজেত্ ৷
জারে নারিয়া বেলির কান্থিপা লিচেত্ ৷৷
ডাহে ডাহে আতজোড়ে মাতের দ্বগরে ৷
” অইলগাহে প্রভু খানি কৃপা কর মোরে ৷৷
লিরি লিরি বৌউহানল আইহে বৌরাজা ৷
কঙালা মিঙালে বেলি এ সংসার সাজা ৷৷”
হুনিয়া সউ এগর কাকুতি মিনতি ৷
হারপেইলা আজি দ্বগয় মালেমর গতি ৷৷
বৌ বারো মিঙাল বিনা মালেম আধার ৷
দ্বগর বরে পালর জীবর সংসার ৷৷

 
হাৱন
কনাক বেলি এচিলাইতে
পলাপলি খেলেইরি ।
বৌহানরে ডাঙা ডাঙা
মেঘের হাদিত লুকেইরি ।।
হাগ এহানউ কোণআগদে
মাঠারকানি বুনিরি ।
হাতহান রঙর নানসামদিয়া
ফলেই ফলেই খৌদিরি ।।
হাৱন মাহার লপুক এগ
চিত্ পাকেয়া পরেসে।
বরণ এহান আয়া তারে
আদ্দেদেনাত থেঙসে  ।।
মুনিথকপা দিনএহানে
হুঙকারদিয়া গুজুরের।
পহরিগর পানিএতা
ডরে ডরে নিক্করের ।।
গুৱার গাছে চঙা এতায়
ডেনটেকুরি খেলতারা।
দিনএহানে গুজুরবতায়
ঠারা ঠারা আটতারা।।
আনিকায়তে লামলইরিগা
গাঙঘর এতার পথেদে।
বেলিরাজায় পলেয়া চার
হাগে থায়া হেরেদে।।
যৌবনফাসে জুনাকচিলা
য়ৌচাহানউ কমনাসে।
কলামেঘর টুমাহানে
তেইরে রাইহা উবাসে।।
তেরাএতাউ মাঙসিগা
বরণহানর ডরহানে।
আধারহানউ মেকসেঙসে
জিনজিনি ‘তার ঙালহানে।।

যৌবন

লেহাউ এগই ডাঙেইরিতা
মুক্সিদিয়া বৌহান।
পাকঠি এগয় দিলগাতা
আনিয়া এ পৌহান।।
মদল্লেইতে উঠিরিতা
ডিল ডিল  নিক্কা।
বছরহানাত আকখুরুমহে
দিরিগাতা জিল্কা।।
কপকপারা দলাগিদেই
কাপকলেইমা নাঙহান।
পাকদিরিতা দিনমাদানে
ফাকফাকেয়া গাঙহান।।
বুড়াকালে মালতীতে
অসে কিরউ   কেঙহান।
অটগিরাঙা জবা ইচের
থতাহানউ বেঙহান ।।
বয়া বয়া গুমটিপেয়া
দেহুরিতা হৌপন।
গাঙরঘরর ভিটা উগত
ফুলপাহেসি যৌবন।।

সুজিৎ সিংহ সুনা’র কবিতা কতোহান

FB_IMG_1596019888231ইমা উরে পেয়ার বানা

হাবিত্ত নুঙেই ইমার উরে থানি
গারগত দরিয়া লটকিয়া
ইমার উরহানাত বয়া থানি
ইমার উরে বয়া গুমে পরানি
হাবিত্ত নুঙেই ইমার উরে থানি

উরহানাত বয়া ইমার লগে গুজুরানি
ডাঙর অয়া ইমা তরে না’পাহুরানি
জরমর পিসে তরে আগে চিনেসু মি,
উহানলো অসত্ জগতে হাবিত্ত ডাঙর তি
মাত্ টাং নেয়া ইমা বুলিয়া ডাহৌরি
আহৌ আটহান হিন পাহুরিয়া
ইমা হারৌ অয়া কলকরৌরি।

আমি গাছ আকজারর ডেল দুগ অসি
ইমারাংত জিঙে বানা আর কুঙগৈ পাসি
ইমা বুলিয়া ডাকদিলে অউরী হারৌ
রাধারাণীরে ইমা নামাত্তারা
তেইরাং নেই কুনো হারৌ।

হারনেপেয়া গুজুরলু মি
ইমার উরহানাত বয়া,
মনে কুনো য়ারৌ নাকরিস ইমা,
হারনাপাউরী সৌ’গ বুলিয়া।

যত্নর পাহিয়া

মোর বানার কালা পাহিয়া আগরে পালেছিলু মোর মনে।
সেলকম্ কলা খওয়া খওয়া থছিলু পিন্জুরার ভিতরে।।
সময় আহান দুরেই দেশে গিয়া পাছিলু বানার পাহিয়ারে।
সারাদিন হান করলু যতন কুনো হিন নাদিয়া থছিলু মি মনে।।
অমাটিক্ বানা নুংশি কতি নিয়াম যতন তা নুঙেই না পেইলো।
পিন্জুরার ভিতরে থায়া কুম্বাকা বনে ফরদানি তা চেইলো।।
নুংশি নুংশি এলা দিয়া থার তা পিন্জুরার ভিতরে খেলেয়া।
তার এলা হুনিয়া বিভুর অয়া আছিলু মি হারৌ অয়া।
খালকরলু আকদিন য়াকরলো থানা পাহুরলো তার বন।
পাহুরেসু তার হিন হারনাপাসু  না চিনেসু পাহিয়ার মন।।
বানাপেয়া খুলেইলু মি পিন্জুরার দুওয়ার বিশ্বাস করিয়া।
গেলগা ফরদিয়া বন বিছারেয়া হাবিরে আধারে থয়া।।
ফরদিলো আধারর বনে মন পিন্জুরার দুওয়ার ভাগিয়া।
নীলুওয়া আকাশে ফরদিলো হুরকাং কালা যত্নর পাহিয়া।।
থাইল কোণ আগদে পরিয়া খালি পিন্জুরা আদর না পেয়া।
আহির পানি পুছে পুছে কাঁদিয়া হাবি আছি কাঁদাত বয়া।।
বানার কালা পাহিয়া ফরদিলো দুরেই বনে পাখহানি মেলিয়া।
উতা দুঃখই আজি মোর আহির পানি বাহের গুলাহান অয়া।।

কুঙগদে কুরাং যিতুগা মি

মি কুঙগদে কুরাং যিতুগা ?

হাবিগদে পাউরি হুদ্দা বাধা !
উত্তরে দেহৌরি পানি, যেপেইত্ মাছ হাতুরতারা।
মিতে হাতুরানি নুৱারৌরি,
উপেইত গেলেগা মি বুরিয়া মরতৌ।
মি সুপ বুরানি নামনাউরি।

মুঙেদে চেইতে দেহৌরি হাবি টেঙারা!
যেপেইত্ আসে হুদ্দা গাছর রাজত্ব,
উপেইত্ হমেয়া পথ পাহুরিয়া –
থানা লাগতৈ জঙ্গলে বুলিয়া।
মি জঙ্গলে বুলানির কা জরম নাসু?
না যিতৌ মি সুপ উগদে।

পিঠি বারাদে অক্সিজেন নেই!
উবেদে হুদ্দা ঘৃণা বার অভিশাপ ফরদের।
মি নিংশা তে কিসাদে কারতৌ?
অক্সিজেন লনার ক্ষমতা মরাং নেই,
উগদে গেলেগা মি ঘৃণ্য বার অভিশপ্ত অইতৌ।
উহানলো মি উগদেউ না-যিতৌগা?

দক্ষিণে দেহৌরি সমাধিসৌধ নরক হান!
উবায়া থানা পারানির ইঞ্চি আহানৌ খালি নেই,
উবারার মাটিত মানু প্রায় গুমিয়া আসি।
গুমজিলে তে কিসাদে মি আকাশ দেখতৌ?
মি আকাশ নাদেহিয়া থানা তে নারতৌ।

উতার চেয়ে মি পাহিয়া অয়া আকাশে ফরদিতৌ,
হাগহানাত্ গিয়া জুনাকর লগে মি থাইতৌ।

জীবন যাত্রার দশা

মুকু নেই! লিখনিগ’ল ইকরাত
লেপইলু মোর জনম।
কিতা লেখতু, কিসাদে লেখতু ? খংকুল নেই জনম এহানাত!
ইকরাত বয়া, দেহৌরি পারাপার অসে সরাহানাত
কল্পুক সৌৱয়া খলকিয়া আহের। মোর নিংশিং!
হাদি মেরাকে দেহৌরি ডাঙর বিট্টি আগ’
মোর উবেদে চেয়া রুসিয়া আহের।
তান্জা চেয়া দিন মেঘালা করিয়া,
দ্বৌ জিলকেয়া কালা বৌ-বরন আনের।
খেলতাম্ উহানাত থকেয়া গুমর মেরাকে
দেহৌরি মর হপন,
পানির সাদে মুকশি দিয়া দিয়া বাহিয়া যারগা।
উতা হাবি ডিগল বাহা আগত
কল্ঠ্ররং লাগেয়া,
দারৌর সাদে খমকরানি নিয়াম চিলসে!
মেঘালা দিনে পারাপার অসে গুলাহানাত।
খানি পিসে দেহৌরি জার্মানির সাদে,
বাহিয়া আহের মোর নিংশিং।
মুকু নেই ফানটেন্ গলো আরতে কতি ইকরে পারতৌ,
চে হানৌ তেঙনি অকরলো
লিখনিগৌ আর আগুৱানি হিনপেইলো।
তবুও না এরতৌ, সেংকরে মুকু দালিয়া জীবন-
যাত্রার কদম কারে কারে ইকরানি না খামৈতৌ।।

পৃথিবী ইমার প্রকৃতির এহান

পৃথিবী ইমার প্রকৃতি এহান চেইতে কতি হবা,
পাহিয়া কিচিমিচি রহিয়া, নুকুলতারা বিয়ান ফুৱইলে।
লিরি লিরি বৌ দের রাতি ফুৱইলে।।
ফুলে ফুলর কুরি সাতনি অকরের।
মুঙেদেত্ত বেলি  নুকুলিয়া আহের।।

পৃথিবী ইমার প্রকৃতি এহান চেইতে কতি হবা।
টেঙারার হাদিয়েদেত্ত জর-জরি হংকরের।
লতায় পাতায় বেলির পহরে, মুকশি মুকশি দের।
বাগান বাগানে নুংশি ফুল, সাতয়া মনহান মৌকরের।।
ঔ পৃথিবী ইমার প্রকৃতি এহান,
জ্ঞানী জীবর অজ্ঞানর কারণে
মিমুত্ অইতৈ আকদিন!

দেহানি না-মনেইলেউ?
দেহাত পরেসি আমি উসাদে দিন।
দিন আহান এরে প্রকৃতির লগে নাথাই তাঙাই,
আমার বিবেক বুদ্ধি হাবি মাঙকর তাঙাই।
দিন আহান গরে বিতরেত্ত, নুকুলে নারিয়া থাইতাঙাই।
ইনচিক্ চিক্ বনর সাদে,
জীব জন্তু হাবি আমার ফামে
তাপ্ক তাপ্ক আমার গর দুৱার হাবি কালকরতাই।
চারিবারা অইতৈ হুদ্দা গাছ গাছরা বার জন্তুর গর।
দিন আহান পারা বেলানিরকা কুনো খালি জাগা নাপেই তাঙাই?

দিন আহান চারিবারা হুদ্দা লতা পাতায় বেরেয়া দেখ তাঙাই!
এগদে হৌগদে হুনতাঙাই জন্তুর রৌ
পাহিয়া পাখ্ মেলিয়া, পানিত মাছ খেলিয়া, হুনতাঙাই গরে বাঘর রৌ।
দিন আহান মানু হাবির পাংকাল নেয়ইতৈ,
বিদ্যুৎ নিকালানির ক্ষমতাউ নাথাইতৈ, ল্যাম্প পষ্টে পহর নেয়ইতৈ।

আমারাং থাইতৈ হুদ্দা আকহান ভরসা,
সেন্দা অইলে ঝিন্-ঝিনির পহরর আশা।
উবাকা মনে পরতৈ অতীতর নুঙেইপা নিংশিং।
ঔ দিন হাবিয়ে য়ারৌ, লোভ, অহংকার বার বানা পাহুরতাঙাই।
উসাদে করিয়া হাবি এরে প্রকৃতি এহানাত্ত মুক্তি পেইতাঙাই?
দিন আহান এরে প্রকৃতির লগে আমি নাথাই তাঙাই !

ভানুমতী সিনহার কবিতা

FB_IMG_1596076546501

সুমে ধরেসে রুকগ

চেইতেতে কতিয়ৌ হবাগ,
ঝক ঝক চক চক করেরগ।
বারাদে হাবির গজে হবা গ,
ভিতরগতে  হতরঙ।
ধরেছে পকগৈ—-
দিনে রাতিয়ে করের খর খর,
মিকুপে মিকুপে করের দর ফর।
যে জ্বালাহানে জ্বালার হৃদিগ,
যেমন সুমে খানেরগ রুকগ।

হিংসার পকগৈ খার যেগরে
নিয়াম হিনপার ভিতরে ভিতরে।
কৈদিনর ভবের বাজারে,
হিংসা নিন্দা কিতার কাজে ।
সুমে ধরলে ঘরর খুটিগ
নিয়াম দিন না টিকের —
ঐরে ঘর অগ।
যেগর হৃদিগত ধরেসে হিংসার পকগ,
তিল তিল করে হংকরতৈ  অগরে-
মানসিক নুয়ারাগ।
বিষাক্ত পক এগ,
যেগৈ থেইকরে পারিসে নিজরাংত,
জনম এহানর সার্থকতা অগৈ পাসে।
হিংসার পক এগ ,
হাবিরাং আসেগ,
মহান মানুয়ে তারে জাবদিয়া থসি গ।
জাবদেনারেসি অগ মানসিক রুগী গ।
হুনার জনম হান
হুনার মনহান ।
হুর হপন  হুনার দেহাগ।
দশদিশাই পলকর নিজরে,
মনেত্ত থেইকর হবানেই পক এগরে ।
লক্ষ যোনি ভ্রমন করিয়া —
পাসি এ মানব জীবন,
বিনালে না মাঙক এ হুনার জনম।
হিংসা নিন্দা দুরিত বেলাদেয়,
অভাগী ইমারে হাবিয়ে হাজেই।
জাতর নাঙে ফুলডাল গাথেই,
আগর লেমপালে আগৈ ধরেই।
হাবিয়ে তিলয়া মুঙেদে আগুয়েই,
পিছে পরিয়া কিয়াতে থাইতেই,
জয় ইমা বিষ্ণুপ্রিয়া মনিপুরী বুলিয়া,
আহিয়া হাবিয়ে ফিরালহান ধরেই।

চিত্রাঙ্গদা

ভারতর আশ্চর্য লাম মনিপুর
ধন সম্পত্তি এ ভরপুর।
অতাপারা সময়ে ,চিত্রবাহন নাঙে,
মনিপুর লামর রাজা গ।
বীরত্বে হাবির গজে, প্রতাপে ,ঐশ্বর্য ই,
অতার পরেঔ রাজা রানি ।,
অন্তরে জ্বলের চুচর জ্বি,
হাবিতা দেসে ভগবানে ,
অতার পরে ঔ অভাবে থসে।
বর মাগের বিয়ানে মাদানে ,
প্রভু মরে রাজপুত্র আগ দে ।
এসাদে করিয়া আকদিন আহিল ,
হারোপা দিন।
রাজকুমারগ পেইতাই বুলতে ,
জরম ঐলি রাজকুমারী গ।
নাংহান থৈলা চিত্রাঙ্গদা ।
হারৌ অয়া করলা ওয়াশক ,
রাজপুত্র গর সমান হংকরতাই তেইরে।
অস্ত্র বিদ্যা হিকাদিল রাজাই নিজে,
ঐলি তেই দক্ষ ধনুর্ধারী
আয়ত্ব করল যুদ্ধ নীতি,
হিকল তেই রাজদন্ড নীতি।
এগোদে বনবাস যাপন কালে ,
বনে জঙ্গলে বুলতে বুলতে ,
অর্জুন আয়া ফৌইলগা মনিপুর লামে ।
অপরূপ চুনাপি নিঙল আগ ,
পরিল অর্জুনর আহির মা।
ফিঙয়া চার অর্জুন গিরকে ,
মনে মনে খালকরের কি অপরূপ !
দেহুরি আজি স্বর্গে আসু না মর্তে আসু।
এমাটিক রূপ,
,ঠৈগ করানি অকরল ডুক ডুক।
আতজোর করিয়া আংকরল তেইরে,
হে অপরূপা ক্ষমা কর মরে !
দেবী তর পরিচয় মাগুরি,
উচিত নাকরিয়া আহে আহে মাতিরি,
পরিচয় পানামনেইলে অস্ত্র ধর আগে ।
অস্ত্রযুদ্ধে হারেইলে মরে,
অবশ্যই পেইতেই পরিচয় অতা ঐলে ।
করজোরে মাতের অর্জুনে,
হে দেবী ক্ষমা কর মরে ।
অবলার গজে অস্ত্রধারন ?
নতকরলু মুর গ টুপকরে দে এব্বাগা মরে ।
মুস্কি দিয়া মাতেইরি ডরেইলে মরে ,
পথগ এরেইলু যাগা তর পথে ।
কিদশাত পরলু ,
বেয়াপার গজে আততুলাত লেপৈলু।
মনে মনে মাতের ,
নাতে ছকৈতৌ ,যুদ্ধ তে করতৌ
আতমিলিয়া অকরলা যুদ্ধ ,
স্বর্গর দৌ নিকুল্লা বার।
স্বর্গ ,মর্ত্য,পাতাল ত্রিভুবন,
নিক্করানি অকরল থর থর।
স্বর্গত্ব অকরল পরানি ফুলর বরন।
বুদ্ধি র ছলে আসারল অর্জুনে ,
মাটিহানাত পরলি চিত্রাঙ্গদা গিথানকরে।
বরদিয়া দৌএ গেলাগা নিজর নিজর ফামে ,
রাজকুমারি উঠিয়া বইলি ,
জবর হিনপেয়া পরিচয় দেনাত লাগলি ।

অর্চনা সিংহর কবিতা কতহান

82627184_626343431460099_7764843070603919360_o
নূয়াপুরানা

হারপাসু এদিন
সেন্ধা অইতই।
এ মিঙাল বেলিয়ে বিদায় মাকতই।

পথেদে শৌর খেল পাহিয়া পলি মেল,
এতাহাবি বেলেয়া আকদিন চিকয়া,
ঠয় পাহিয়া এগো দেহা-পিনজুরগো
চরেদে এরাদিয়া যিতইগা ঠকেয়া,
এরে দিন-এহান আদারে জাপতই।

মর জরম-মাটি বাসেয়া আসে মরে,
সেঙ-করতো- করে,
অনাচার দেহাগো যজ্ঞর জ্বিগৎ
সেঙ-করিয়া তর লাইক করতই।

বারো আইতউ মি
তর এ নূয়া মেলে,
নূয়া তালে মিঙালে,
নূয়া-ক দেকতউ নূয়াতা চেইতউ
নূয়া হেকে বেণাগো নূয়া-ক বাতউ,
সেঙ-ক নূয়া এতা পুরানা অয়তই।

ডিসেম্বর ২৪, ২০১৯

 

ঠাচা

ঙাহাকর দেহা তর কেথকপা আহি-মিত্তা
হৃদিগো য়ৌচা অইলু মি ঠাচা।
ঔ দিনেত্ত বাদের হৃদিয়ে য়ারি মচামচা।
সেন্ধা হাগর পূর্নিমা-রাতি
য়ারি রস ফুটি তেরা কুটিকুটি,
হুনাদিল মরে তর য়ারিচুটি।
হৃদিগো য়ৌচা অইলু মি ঠাচা।

ফাল্গুন বৌ কুকিলর রৌ
চিকপা রাতিয়ে দের মরে তর
নাপাজালা কালি করপেক পৌ।
হৃদিগো য়ৌচা অইলু মি ঠাচা।

হৃদি থসে মনে লেহাউর বনে
নাপাজালা য়ারি জট বৌসুরি,
চিনাফুতি হালে খেতকরা তালে
নারচাসি সুর সিতারাসে মনে।
মুলুক জাপেসে য়ৌচা বৌয়ে
হৃদিগো সকর কুকিল রৌয়ে,
ঙাহাকর দেহা হুতে হৃদি পাহা
হৃদিগো য়ৌচা অইলু মি ঠাচা।

ডিসেম্বর ১৭, ২০১৯

 

পিঞ্জুরারমন (মিশ্র কলাবৃত্ত ছন্দ)

কুরাঙ বিসারতু তরে।
মন্দির মসজিত গীর্জা গুরুদুয়ারা
গঙ্গা পুণ্য পারে।
পিঞ্জুরা বাগিয়া মন পাহিয়ায়
মনর ভিতরে ফরদের।
হাগর উদাম বৌয়ে সকোসকো হৃদিগ কাদের।
কতি দূরেই ঔ ফাম,
তর পূণ্য ধাম,
আহিগি মেলিয়া নাদেহুরি।
কালাক-পেলয়া দেহিঙ নে তরে
হৃদির আহি মেলাদে মরে
এহান মাগুরি।
পিঞ্জুরার মন
না চিনের ধন
হিন দুক বারিত পলার।
তরে দেহানি হৃদি মেলানি
জ্বালা নেয়া কিসাদে মনার।

জানুয়ারি ২৫, ২০২০

 

লৌনাম

লেইপাকে যেতা আসে
খেলাফামে দেসত তা।
এরে কথা চুটিহান পাহুরিয়া
নাপালে মি পরেসুতা।

দিদিনর খেলাফামে
লৌনাম নাঙে মাঙে,
মুলুকর লেইশাঙে
মাঙসেঙ মাঙ আতে
জাতজাত খেলাজাতে
বন্দির বেরিফঙে
দিশানেয়া আদাপথে
উঙপাঙে পরেসুতা।

মেলেসে হে মেলেসে চা
সেইত্যর আহি চাতা
মুলুকর মেঙসেলে।
খুটিনেই য়ারি উতা জাপেসে চা
রাতিকার তারাজপা দিনকার বেলিমেলে।
আনা যানা সিনা পানা
বৈঠালো ঘাটে বনা,
সেইত্যর পাল্লালো
বেপারিগো পাক্কাগো,
বাসাসে চা ঘাটে বয়া,
দিদিনর খেলাফামে
লৌয়েল লৌনামে
আপ্পানে পরেসুতা।

ডিসেম্বর ১৮, ২০১৯

 

হংস বাহনী,(অক্ষরবৃত্ত মুক্তক)

লেইসা চুলে মকর-কুন্ডলে
বেণা আতে পদ্মসিংহাসনে
ত্রিনয়নী দলা কুশাসনে
বহেসে যেসাদে হউপন পুরিত
নূয়া ডেম থরো ইকর সুরিত।
কন্ঠে তেইর মেয়েক সাগর
বাটলে না কমর——
শূণ্যতা পূর্ণতা জ্ঞান অজ্ঞনতা
খামতল সিমানা লালফামি
হংসবাহনে চরণ-হানি।
থমথম করের টেইপাঙ মাটি
যজ্ঞ মন্ত্র রৌয়ে।
ফরফর করের টেইপাঙ যেসাদে
করপেক বৌয়ে।
টেইপাঙ মিমাঙে আজি হারৌ মেলা।
চিকয়া হৃদিয়ে ভজের মন্ত্রর মালা।

জানুয়ারি ৩০, ২০২০

 

নালেপ্পামেয়েক

না ইকরা ইতিহাস
নালেপ্পা মেয়েকে
জনম আহান দিল
পথর মেরাকে।

কালি বুজা কলমর পারেঙে পারেঙে
না ইকরা ইতিহাস
না লেঙকরা তালে
নূয়া রাগো লেঙর চা
দুখর টেঙারা মেয়েক আকারর মা,
না ইকরা ওয়াহি।

কালি ফোটা পরের চা
মিঙাল সকয়া
মেত্তমকার বেলিহানে
টেঙারা গলেয়া
জনম আহান দিল
না লেপ্পা মেয়েকে
না ইকরা ইতিহাস ডেরি ডেরি পাতা
করপেক হাজাদিল
না লেপ্পা মেয়েকে।

ডিসেম্বর ৩১, ২০১৯

 

নূয়া রাগো

কিহান দেকলু আহিগো মেলিয়া
বিয়ান বেলির ঙালে।
হুনার কান্থা জাপেসে মাটিয়ে
আজি এ বিয়ান কালে।

রাতিকার তেরা এবাকাউ হাগে
করের মিঙাল দাবি।
টেইপাঙ মাটি পাহিয়া মুলুক
আবিজাবি আসি হাবি।
ঘুমর আহিত কেজার পাতায়
মলয়া বৌর ঠেলা—–
আয়া টেইপাঙে মিঙাল এহান
রচাসেতা এতা খেলা।

নূয়া রাগো আগো মুলুক জুরিয়া
নুংশি হেকর তাল।
পাহিয়া পলির কিচির-মিচিরে
রচের তাল-বেতাল।
খেওয়ানিগো ঘাটে নূয়া খল্লিকে
অরার বেজান এলা।
বাটিয়ালি হেকে যৌবনে মাটি
খেলার মাতামবালা।

টেইপাঙে আজি এ হাগর তলে
কিহান দেকলু ঙালে।
নূয়া রাগো আগো রচাত লাগেসে
হাগ এহানর তলে।

ডিসেম্বর ১৭, ২০১৯

কিয়া হার না পাউরি, চিকারি দিয়া কাদানি আহের

53347641_318590349014524_3681111822523432960_n কিয়া হার না পাউরি, চিকারি দিয়া কাদানি আহের
রাতিকার ইম্পানিহানে মাতেদের নারানি হানরে।

জীবনর রঙ এহান যেমন রঙ নেই চিনহান
পাহুরে নারুরি স্মৃতি,খালকরৌরি পাহুরতৌ।

বানাপানার দিন উতা হপনে জিংতা অয়া থাক
নিঙশিঙে আহির পানির ছড়াহান বহের।

লিশিং লিশিং দূরেইত আসে মন দ্বিয়হান।

ফিরিয়া আহের হপনে বুজা অতৃপ্ত বানা।

ইম্পানি রাতিহানে য়ারি দের মনহানর লগে
বাহুয়েয়া আনের ঔরে দিন উতা!

পাহুরেসু নিজরে,চিনেসু তরে,তরে পাহুরে নারেসু
জীবনহান তিঙিয়া যারগা ইতু করা আহির পানিল।

মন পারদর উমহানর লগে লটকিয়া থাউরি
মর মাতে নারানির কথা উপ পারেসত তা?

ইম্পানি অয়া নিলেগা তি বিদায়

ইম্পানি অয়া নিলেগা তি বিদায়
জাংহান থনার জাগাহান বিসারানি নাইল
জিংতা অয়া আসু ভূমিহীন অয়া
কবিতা লিখুরি বিসর্জনেত্ত তুলিয়া আনিয়া ।।

পিছলন দিয়া পড়ে যাউরিগা ঘাটর ডঙরগৎ
আকগয়ৌ না দেখতারা পড়ানি হান,
খাং লাগের তিঙা আহি দ্বিয়গি
সেইকুপ করুরি যত পুরানা স্মৃতি ।।

ডকপা নংকুপিগর চিকারি আজি ইম্পানি
জ্বি লাগেসে মর চাইরো বারাদে,
আগ্নেয়াস্ত্রর ট্রিগারে আঙুলিগ থইস
বুকগ পাতিয়া থসু রকতল হিনানিরকা ।।

না পুসেদিস

না পুসেদিস
হৃদিগর সেলেটহানাৎ
আকা ফটকগ
খেৎকরা নাংহানরে ।

না পুসেদিস
জোনাক হানর
চন্দ্রবিন্দু গর
মিঙাল হানরে ।

না পুসেদিস
মাঙয়া গেসিলগা
ফিরিয়া আহিল
ইকরার টেইপাঙরে।

না পুসেদিস
আধা রাতি
ঘুমহান বাগলে
আহের মেইথঙ হানরে।

না পুসেদিস
পুরানা দিনর
ঔরে দিন উতা
ঔরে ইতিহাসরে ।

না পুসেদিস
নিঙশিঙ নিঙে
জাবদিয়া থার
তিঙা আহিগিরে ।

মনাউরি হেমন্তর মাদানে

মনাউরি হেমন্তর মাদানে
হোনার রৈদগৎ
পাকানা ধানর ক্ষেতির হাদিৎ আটানি।

ঔরে নীলুয়া হাগহান
যেপেইত লমসেগা,
সকসেগা আসাংপা গাছর মুরগ
উপেইত যানা মনাউরি।

দূরেইত আসাংপা টেঙারাগ
যেপেইত বেলিগ জাবুরের
আবিরর রঙ ফরদোএয়া,
উপেইত ফওনি মনাউরি।

পিঞ্জরাগৎ বন্দি তেনুয়াগ
পাখহানি ঝাকারার,
পাখহানি মেলানি মনার,
সীমানেই হাগহানাৎ।

বয়া বয়া হপনর চারা রুওয়াউরি।

১৯ ডিসেম্বর, ২০১৯

ঘুম নেই আহিৎ

ঘুম নেই আহিৎ
নিংশ্বাহান এবাকা মুষ্টি হানাৎ।

তিঙা ইনাফি হানল পুসে পুসে
যাউরিগা নুনটুকা পানি।

নুনটুকা তরাং হুয়াত !

আহিগর মুঙ হানাৎ আগুয়েয়া আহের
হাসপাতালর গধ।

মরণহান কাদাত আয়া উবা অসেগা।

ফামহানাৎ আসে নিয়াম্পারা হজকর বাক্সগ;
দেহানির পরেউ সন্দেহ কিয়া!

মমবাতি আগ লাগাদে নারলে তি !

জিনার হিসাব

24312654_356568518139058_7301383428574947336_n

হুরকাং কালে হিকলু মিতে মানসাংক।
ডাঙর অয়া পারলু মিতে, যোগ,বিয়োগ,
পূরণ, আরতাও ভাগ অংক।।
আরতাও হিকলু ডাঙর ক্লাসে চক্রবৃদ্ধি, সুদাসল।
এতা হাবিত্ব করতে নুঙেই অংক মানসাংক।।
তোরাং আছে পাচগো কমলা, তেইরে দুগ দিয়াদে
বুললে রৌ মেলিয়া কাদানি।
মোরতা কমৈতৈ নাদতৌ তেইরে, উল্টা গিয়া ঠেলা দিয়া,বেলা দেনি।।
যোগ করলে হাবি তিলনি।
বিয়োগ করলে বাদ্ দেনি।।
পূরণ করলে দ্বিগুণ, তিনগুণ অনি।
ভাগ করলে সমান ( হঙে) বাট অনি।।
চক্রবৃদ্ধি করলে সুদে, মূলে, আরাতাও সুদ তিলনি।
এতা কিতা অংকর নমুনা হিকলাং আমি স্কুলে।
ডাঙর অয়া সংসার পাজালতে লাগিল এতা অংক
জিনার কামে।

২৯.০৯.২০১৮

ইনচিক্ লাম

ইনচিক্ লাম আহান,
কুরাং বিছারেয়া পেইতৌগাতা?

থানা নাইল মোর আর,
এ দুনিয়ার রৌ এতায়।।

গেছিলুগা মি হৌপনে,
হুনার দলেইলো।

গিয়া দেখলুগা ঔপেইত্ ,
হাবিয়ে আছি শান্তিলো।।

শান্তিয়ে, শান্তিয়ে
ওম্ শান্তি।

এবারার ডাকে আর,
নুয়ারলু ঔপেইত থানি ।।

গিরকে আলথক,
করে দিলো মোরে ।

যাগা তি,
তোর লামে ।।

এসাদে বানার,
ডাকর রৌয়ে ।

তোরে থনি নাইল,
এ শান্তির লামে ।।

আলথক ্ঐলু,
মি সেংকরে।

এ জন্জাল,
ঘাটানির ঘাটে।।

জীবন এহানৌ,
লাম আহান
ভবর বাজার হান।।

কিতা করতু,
কুরাং যিতুগা ?

দিন নাহেসে পেয়া,
বেলেয়া যানি অর থাং?

তোর দিন না,
ফুরেছে পেয়া
বাজারে লমর থাং ?

কৈদিন ফাকি
দিতৌতা মি,
নিজরে মন বুঝেয়াও?

তপস্যালো বহেসু আজি,
আলথক যানা মনেয়া
ঔ হুনার লামে।

ঔদিন ঐতৈয় সাত্
পেইতৌগা সাত্
মোর ইন্চিক লামহান।।

মহার পৌ

হুনৌরি মি মহার রৌ।
দিতারা মরে কানে পৌ।।
আয়তারা তানু মহাচুক্তিলো।
আয়তারাতা আগয়, আগর যুক্তিলো।।
মাত্তারা মোরে কানে পৌ।
আমারে খানি করেদিস দৌ ।।
আমি আয়তাঙায় তোরে চুমা দেনিত।
আতে,জাঙে, নাকে, গাড়ে,
আমারে খানি মিল্লেং থদিস।।
মাত্তারাতা তানু মোরে।
না সৌয়ৈস তি আমার এলার সুরে।।
বেন বেনেয়া আয়তাঙায় হাবিয়ে।
তোর মহরী হানর ভিতরে, বাহিরে।।
পাঙলাক দিস তি আমারে।
আমি হাব্বিয়ে বর দিতাঙায় তোরে।।
মহার জীবনলো আর থানা নার,
আমারতা এ ভব সংসারে।।
পারলে আমারে বানা পাদিস।
তোরাং আয়লে বাকী না থদিস।।
দিতেই আমারে তি মুক্তি।
এহান আমি তিলয়া করলাংতা যুক্তি।।
কিসাদে বেলতু তানুর অনুরোধ।
খবরহান পেয়া অইলুতা অবুঝ।।
খাল্করৌরি কিহান করতু?
কিসাদে করিয়া তানুরে মারতু?
খালকরিয়া চাওরি তানুর বারারগো অয়া।
হাইহান্তে মাত্তারা, কিসাদে তানু
জিঙতা অয়তায় , রকত না পিয়া?
মনহানরে তেমজেইলু, তানুরে কিসাদে উদ্বার করতু
মহরী হান না টাঙিয়া জিরেইলু।
তানু আয়া বহানির, সিচিল করিয়া থৈলু।।
আইলা তানু খানি পরে।
বহিলা মোর আতে, জাঙে।।
দেওরি থাপর লাগাল নাপাওরি।
তানুর কথা থৈতে, রকত দান করতৌ পাওরি?
এবেদে,হৌবেদে বারা বুলন দিয়া চাওরি।
সময়ে আকগরেও লাগাল নাপাওরি।।
এতাপারা মহায় মোর লগে চালাকি করলা।
মনুষ্য গো অয়াও মোরে বোকাগ হংকরলা।।

০৬.০৭.২০১৮

হেইরাপ্ সকছিলু আঙুলি উগি

61584414_986211331769893_8254196929752203264_n
আকদিন সেন্ধ্যার উরাদারাৎ
হেইরাপ্ সকছিলু আঙুলি উগি
আজিও নিঙসিঙে কনাক ইয়া আছে।
পানার সালে নাগৈ ওরে সকনা
কাদাকাদিৎ যানার কথাও নেই
তবু ইঙাল ঙালসে হৃদির নিঙে
হাবি গেলগা ! আর যেতা আসিল
সেচুরিয়া পরিল জনমর পথে আশা-
মেরাক সেরাকর ঘুমে বাগা হপনর দেহি।
মিমৎ ইয়া চাউরি আলয়া গেলগা পথেদে
দাগ আহান আছে তাজা অইয়া
আঙুলিৎ, হিনিয়া আহির পানিৎ !

০৬.১১.২০১৭

ইমচিক ঠারে তি

বেশি দিন নাইসে তরে চিনুরিতা
তি মরাং কিগ ইসত, মিও মাতে নুয়ারুরি
এরে কয়দিনর বকর বকরে
মরে প্রায় পাগলই করলে!
রাতিহান যত নিঘোর অর,তর আবদার
বাধ ভাগের, হট্ গ এত বেশি অর
আকিমাও মিও বাহুরি লগে!
বাস্তবর রেড় বাগিয়া এতহান যানা ইল
আকদিন ডাঙর নদী আহার পারে উবা ইলে
মি আসু এপারে ,তি ওপারে-
কিহান্তে করানি খালকরলে তি পয়লা আজি?
যেহান মি আগেই উত্তর পেইলু!
আজি কালি তি, ইমচিক ঠারে এত টতারার্

মি খাঙু ইলু!তি এতাহাবি কিসারে মাতর
তর এরে ইমচিক ঠারল ! বানা দেওরি তরে
বপকরে আরও বপকরে মি!
পুঞ্চিপালক তর এ ইমচিক ঠার আমরণ!

০৯.১১.২০১৭

যুদ্ধহান আকহান হুদ্দা মি নারিসুতা

53268249_531237213951145_2398868496151740416_n
যুদ্ধহান আকহাত হুদ্দা মি নারিসুতা
আহিগি আকমাউ হবে তারাঙ তারাঙ ইসিল!
মি অভিমণ্যু নাগই,যে পথ নাচিনেসু,
যুদ্ধহান আকহানহে ইমে তি জিঙেসৎতা।
মি কোনো মেঘদূতগ নাবে যে-
তি,ছদ্ম বেশে মর যজ্ঞর ঘরে আহিতেই!
আকমাউ হুদ্দা জুহান ফকিয়া পরিসিল তা
তর থঙচিলে,দিব্যবাণী হুনিয়া!
টেকটেকার লেজগর অসারে শক্তিল মি বার
আলইলু গেলগা দিনর ইয়াহাত পারাদিয়া।
হবে আকমাউ পিছ আঙসিল অসিলুতা
তর হুয়ার নুংসিপা খঙচেলে “পিৎকুরি”!
আরতা নাইব আঙসিলে চানা রাবণর চিতাগ-
নিভলে নিভক,আর যুদ্ধে হারানিতে নাইব।

১৯.১২.২০১৮

ওয়ারৌ

হটগ নেই ইংগ পানিহার উসাদে মন এহান,
কার পথগ চেয়া আসে বাসিয়া।
ফুলর গতে নিক্কা বিয়ানে আহিতারা আগ দুগ
লাজ নেই প্রজাপতি নাসিয়া।
মি নাসা পাহুরলু,চালিহানউ,খোপাখুসি বেল্লু,
সাঙ্কাপর নাসাত বেলাসিলু ঠইগ!
হাবির মুঙে মালঠেপে,কার ঢাকর তাল বাগিয়া
ঘাম ঘাম!ঘাম পুসানিৎ অসিল গৈগ।
মর বিবাগী মন এহান সাংগাল করেসিল মনে মনে
আরতির এলা সকইয়া ।
ইসাংকাপা সভ্যতা বেলির মিঙালেত্ত দূরি উদিনেত্ত
ওয়ারৌ করিসিলু বানাই আকইয়া!
আজি কোনো ওয়ারৌ নেই কারো লগে,
বানাউ নেই ইসাংকাপা হৃদিৎ,
কুরাঙত আহের হটগ আকেই মাউ
হাবিরাংত করের তঙাল আমারে হাবির হাদিৎ!

২৫.১০৬.২০১৯

হবারাতি আহান আহক হাবির কা।

যেগই তরে হারনাপেইল
যেগই তরে নাই চিনলো
অগর কা সময় মাংকরানি?
যে সময় গেলগা বাহিয়া
পিঞ্জুরা এরাদিল যে পাহিয়া
ঔ সময় অ পাহিয়ার কা খালকরানি?
নদীহার পানির সুনা আহিল যেগ,
আলয়া নাহানির পথে গেলগা অগ,
জমনর পথে, কানা নেই,অগরে বাসানি!
২৩.০৪.২০১৯

মাঙ সেঙ

মিও যুধিষ্ঠির নাগৈ ,না তিও মন্দোদরী
তবু মি মাতলু তি একরলে!
এরে বানাপানি বানাপানি তর মর-
আকদিন কুন্তীও পাসিলি নিরালে,
এরা দেনা লাগের আকদিন। মনর
পিঞ্জরর পাহিয়াগিও,যেইগা বুলিয়া!
তি মরে এইগা বুলিয়া কাদাৎ আহেসিলে,
মি পূজা দেসিলু তরে’ল বর্তিগ হেইকরিয়া।
কাদাৎ আহিতেও নাও খামকরেসু,
দূরিৎ যিতেগাও নাও খামকরিম।
এরে যে মাঙ মাঙ বুলিয়া দূরি করুরি মরে,
সেঙ সেঙ ইয়া তি পালসৎ অহানউ-
মর পূজার সালে,মর বর্তিগর সালে!
আকদিন আহিস,চেয়া যিসগা সকইয়া,
মর লেইসাঙর মাটি এতা কতি মাঙ অসে
তর পূজার সালে, তরে সেঙকরতে!
না মি যুধীষ্ঠির, না তিও মন্দদোরী
তবু তর মর সৃষ্টি মাঙে সেঙে তিলয়া অমর।
মর বাগা লেইসাঙর মাটি সেঙ না মাঙ?
তবু থাক এরে বর্তির পূজা মর মাঙে।
তি সেঙ পরীগ ইয়া ফৌর্দে নুয়া হাগে,
মি যুধিষ্ঠির নাগৈ,না তি মন্দোদরী
তবু মর মাঙে মি,তর সেঙে তি হমাজি।

০৪.০৪.২০১৯

ধ্যান

করতে করতে পাতালে থেঙযারগা জাঙ এহানি,
পাথরর মূর্তি আগর মুঙে মর যত ধ্যান!
মুরগ বাগের,রকতর ছড়াহান বাহের তবু
কানা নেই এরে ধ্যান,আপ্পানেহান ইসে।
মূর্তি অগর আহির পানি মি দেখলু,
আকমাউ নাগৈ কত্তমাউ!
কিয়া কাদর? কিয়া কাদর?
আংকরলু ,কোন জবাব নেই।দীঘল নিংসার মাহি
চারিবারাদে আধার করিয়া এরাদিল হিম্পিয়া!
মি চাউরিগ,কতযুগ আগেত্তই
উপনারেসু,আজিও উপনারুরি,
কালিও চেইতউ উপনুয়ারিয়াই!
কোরাং মাংকরেসে পরশপাথরগ কি জানে,
যদি হারপিতু,যদি আক্ষুরুম মাত্ত-
থতাহাং খুলিয়া,মরতা পাতাল পেয়া যানার কথা নেইসিল।
ডর জবর মূর্তিগ তর মুঙেই এরাদিলু
এমারিকার লাংকরা জনম এহান।
বারো পাতাল এরাদিয়া তর লগে মান্না ইতউ,
হয়তো তর ডর নেয়তই,নাইলে মি পাথরগ ইতউ।
১৮.০৩.২০১৯